Müxalifət fəalları Nəsimi polisində işgəncələrə məruz qalıblar

Mayın 6-da mühakimə olunmuş NİDA hərəkatı fəallarına dəstək aksiysında iştiraka görə həbs olunan AXCP üzvü Kəmalə Bənənyarlı Nəsimi polisində saxlandığı müddətdə təhqir və işğəncələrə məruz qalıb. Bu barədə Turan-a vəkil Əsabəli Mustafayev bildirib. O,mayın 8-də Binəqədi təcridxanasında K.Bənənyarlıya baş çəkib.

Vəkil polis zorakılığının əlamətlərini qeydə alıb. Onun sözlərinə görə, K.Bənənyarlının başında şiş əmələ gəlib, ürəkbulanması, başgicəllənməsi var ki,bu da beyin silkələnməsinin nəticəsi ola bilər.

Vəkilin sözlərinə görə, K.Bənənyarlıdan tələb ediblər ki, AXCP lideri Əli Kərimlinin əleyhinə ifadə versin, guya o, etiraz aksiyasında iştiraka görə fəallara hər ay 400-500 manat verir.

Bundan əlavə, onu Sülh və Demokratiya İnstitutunun direktoru Leyla Yunusla tanışlığı barədə dindiriblər və Bənənyarlını L.Yunus kimi vətən xaini adlandırıblar.

K.Bənənyarlıya deyiblər ki, “onun kimilər Amerika və Fransadan pul alaraq Azərbaycanda iğtişaşlar və çevriliş törədir”.

Vəkilin sözlərinə görə, K.Bənənyarlının hüquqları məhkəmədə də pozulub. Əvvəlcə məhkəmə onun 20 sutkalığa həbs olunduğunu elan edib, lakin fəalın hiddətini gördükdə yazılı qərarda 30 sutka göstərib.

Ə.Mustafayevin sözlərinə görə, saxlanılanların hamısı qeyri-insani davranışa məruz qalıblar. 22-ci polis bölməsində 14 nəfər bütün gecəni şəraitsiz otaqda saxlanılıb, onlar stol və stulların üzərində yatıblar, döğmaları ilə əlaqə yaratmalarına imkan verilməyib.

Vəkil K.Bənənyarlının və 15 sutkalığa həbs olunmuş Müsavat Partiyasının fəalı Tural Abbaslının həbsindən apellyasiya şikayəti vermək niyyətindədir.

Bundan əlavə, vəkil K.Bənənyarlıya qarşı işgəncə faktları ilə bağlı müvafiq orqanlara şikayət etmək niyyətindədir.

Qeyd edək ki, DİN mətbuat xidməti K.Bənənyarlıya qarşı zorakılığın olduğunu təkzib edir. Bununla bağlı vəkil bildirib ki, belə olan halda təcridxanada müstəqil tibbi müayinənin aparılmasına icazə verilməlidir. –06В-