Nardaran işində yenə mübahisə düşüb

Dekabrın 14-də Bakı Ağır Cinayətlər Məhkəməsində “Müsəlman Birliyi” Hərəkatının həbsdə olan sədri Taleh Bağırzadə, AXCP sədrinin müavini Fuad Qəhrəmanlı və digərlərinin cinayət işi üzrə növbəti məhkəmə iclası şahid ifadələri ilə davam edib.

Prosesdə hakim Əlövsət Abbasov keçən məhkəmə iclasında təqsirləndirilən şəxslərin vəkillərdən imtinası ilə bağlı bildirib ki, vəkillərdən imtina etmək üçün heç bir səbəb göstərilmədiyinə görə məhkəmə prosesi həmin vəkillərlə davam edir.

Daha sonra Yalçın İmanov vəsatətlər verməyə başlayıb.

“Bizim vəsatətlərimizindən biri Ramil Usubovun şahid qismində iştirak etməsidir. R.Usubov televiziyada bildirib ki, 23 dəfə Nardaranda polislərlə toqquşma baş verib. Daha sonra deyib ki, 2 nəfər polislə birlikdə, 5 nəfər də həlak olub. Biz 4 nəfəri bilirik. 5-ci şəxsin cinayət işində adı yoxdur. Bundan sonra deyir ki, Nardarandakı əməliyyat İlham Əliyevin tapşırığı ilə olub”.

Bundan sonra təqsirləndirilən şəxslərdən Taleh Bağırzadə çıxış edib.

O, çıxışı zamanı bildirib ki, “2005-də “Qara kəmər”əməliyyatı olanda bir çeçeni buraxmışdılar. Ramil Usubov rahat şəkildə dedi ki, Heydər Əliyevin göstərişi əsasında azad etmişik. İndi isə deyir ki, İlham Əliyevin əmri ilə Nardaranda əməliyyat keçirilib. Bu adam açıq-aşkar deyir ki, bu cinayəti bizə İlham Əliyev əmr verib. Əgər İ.Əliyevin bu prosesdən xəbəri varsa, cinayətə şərikdir. Yox, əgər xəbəri yoxdursa, bəs niyə prezidentdir?”.

Vəkil Yalçın İmanov vəsatətlər verməyə davam edib. Vəkil əlavə şahid kimi DİN hospitalındakı həkim Ramiz Əhmədov və 3 saylı şəhər klinik xəstəxanasının baş həkimi Fikrət Zeynalovun dindirilməsini istəyib.

“Cinayət işinin materiallarından bəllidir ki, Nardaranda yaralananlar o xəstəxanaya aparılıblar və ölüblər. Əlavə sahid kimi ona görə gəlsinlər ki, gəlib burada ölüm tarixini, meyidin kimə verildiyini, niyə ölən şəxslərin meyitlərinin 9 gün sonra geri qaytarıldığını və s. bu kimi suallarımıza cavab versinlər”.

Hakim vəsatətləri təmin etməyib.

Keçən məhkəmə prosesində vəkil Yalçın İmanov 8 hal şahidinin dindirilməsini istəsə də, hakim o vəsatəti təmin etmədiyini bildirib.

Bu zaman T.Bağırzadə deyib: “Hal şahidi ilə bağlı vəsatəti təmin etməməyiniz qəribədir. İstintaq işində əsas gedən hal şahidləridir. Həmin hal şahidləri 26 noyabrda silahları görən adamlardır. Siz vacib şahidlərin gəlməsini təmin etmədikdən sonra, hansısa vəsatət verməyimiz artıq gülüncdür”.

Bundan sonra məhkəmədə fasilə elan olunub.

Fasilədən sonra məhkəmə prosesinin ikinci hissəsində özünü jurnalist kimi təqdim edən polis əməkdaşı məhkəmədə iştirak edib.

Təqsirləndirilən şəxs Abbas Hüseyn o şəxsi tanıdığını, iki ay bundan əvvəl zaldan çıxartdığını bildirib.

Özünü jurnalist qismində tanıdan şəxsdən vəkillər hansı saytda işlədiyini soruşsalar da, o suallara cavab verməyib. Bu zaman təqsirləndirilən şəxslərlə həmin “jurnalist” arasında qalmaqal düşüb. Bir qədər mübahisədən sonra həmin şəxs zaldan uzaqlaşdırılıb.

Daha sonra Taleh Bağırzadə hakim Əlövsət Abbasova Ənvər Seyidovu misal çəkib. Ə.Seyidovun cəzasını Allah verdiyini və hal-hazırda reanimasiyada olduğunu qeyd edib. Bu zaman hakim Taleh Bağırzadədən oturmasını istəyib. T.Bağırzadə isə “Məni İlham Əliyev otuzdura bilməyib, sən otuzduracaqsan?” deyə cavab verib.

Bu vaxt hakim T.Bağırzadənin məhkəmə zalından müvəqqəti uzaqlaşdırılmasını bildirib.

Bundan sonra təqsirləndirilən şəxslər etiraz etməyə başlayıblar. Buna baxmayaraq, hakim növbəti məhkəmə prosesini açıqlamadan zalı tərk edib.

T.Bağırzadə jurnalistlərə bildirib ki, hakim Ə.Abbasov Elçin Quliyevə zəng edib, məhkəməyə gəlməməsini istəyib. -36D-