Nardaran sakinlərinə təziyəni tam keçirməyə imkan verilməyib (YENİLƏNİB)

Çərşənbə axşamı Nardaranda əhalini İmam Hüseynin 40 mərasmindən çıxarıblar. Bu haqda Turan-a kənd ağsaqqalı Natiq Kərimov bildirib.

Onun sözlərinə görə, hüquq-mühafizə orqanları bu addımı “təxribat”ola bilməsi ilə əlaqələndiriblər. “Nə qədər inandırmaq istəsək də ki, adamlar bir-bir yoxlanıb mərasimə buraxılıb, nəticəsi olmadı”, - deyə N.Kərimov qeyd edib.

N.Kərimovun sözlərinə görə, noyabrın 26-da hadisələr zamanı həlak olanların harada dəfn edildiyi məlum deyil. “Bir nəfər deyə bilmir ki, bu qəbir bu şəxslərindir, elə ağızdan ağıza eşidilir ki, onlar dəfn edilib, amma harada dəfn edilib, bu müəyyən deyil”, - deyə N.Kərimov qeyd edib.

N.Kərimov kənddə dini atributların söküldüyünü təsdiq edib. “Əməliyyat aparırlar, bu, aydındır, bunu başa düşürük, amma başa düşə bilmirəm ki, dini atributların, dini plakatların cinayətkarlığa qarşı mübarizəyə nə qədər aidiyyatı var və ya atributların bura nə dəxli?”, - deyə  kənd ağsaqqalı mövqeyini ifadə edib.

Onun sözlərinə görə, kəndə elektrik verilməsi hələ də bərpa olunmayıb və nə vaxt bərpa ediləcəyi də məlum da deyil. -05B-

2015 Dekabr 02 (Çərşənbə) 12:41:27

Nardaranda qeyri-rəsmi fövqəladə rejimin olmasına baxmayaraq, yerli sakinlər İmam Hüseynin Kərbəlada şəhid olmasının 40-cü günü ilə bağlı Nardaran pirinə matəm mərasiminə toplaşıblar.

Başqa regionlardan dindarlar mərasimə buraxılmayıb. Daxili Qoşunların və DİN-in xüsusi təyinatlı dəstəsi hələ  də qəsəbədədir. Onlar pirə gələn dindarlara maneçilik törətmirlər. Bu barədə Turan-a qəsəbə Ağsaqqallar Şurasının sədri Natiq Kərimov bildirib.

Bununla belə, o qeyd edib ki, dünənki əməliyyat zamanı 19 nəfər saxlanılıb. Bir ailədən üç nəfər saxlanılıb. Bu hadisə nəicəsində onların anası infarkt keçirib.

Altıncı gündür ki, qəsəbədə elektrik enerjisi yoxdur. Təkcə Nardaranın girəcəyində deyil,  Maştağa qəsəbəsində də polis postları qoyulub.

Məktəblərə göstəriş verilib ki, şagirdlər vaxtından əvvəl evə buraxılmasın. Bu barədə yerli mənbələr bildiriblər.

Eyni zamanda Maştağadan Nardaran istiqamətinə şəxsi nəqliyyat buraxılmır.05B-