Prezident İlham Əliyev Naxçıvanda bir sıra istehsalat və sosial obyektlərin açılışında iştirak edib

 Prezident İlham Əliyev dekabrın 1-də Naxçıvanda bir sıra istehsalat və sosial obyektlərin açılışında iştirak edib, deyə dövlət başçısının saytı məlumat verir.

İlham Əliyev Babək rayonunun Xalxal kəndində Günəş Elektrik Stansiyasının açılışında iştirak edib. Stansiyanın ümumi sahəsi 35 hektar, gücü 20 meqavata bərabərdir. Tikinti işlərini Belçikanın “Soltech” şirkəti həyata keçirib. Stansiya muxtariyyatın ehtiyacının 5%-i təmin edəcək.

Bundan başqa, prezident İlham Əliyev Naxçıvan Sənaye Kompleksinin açılışında iştirak edib. Kompleksin ümumi sahəsi 9 hektardır və özündə 4 zavodu birləşdirir.. Zavodda il ərzində 150 min ton məsaməli beton, 36 min ton əhəng, 40 min ton gips, 2 mln kvadratmetr gips lövhələrin istehsalı üzrə zavodlar fəaliyyət göstərir.

Muxtar respublikaya səfəri çərçivəsində İlham Əliyev Naxçıvan şəhərdaxili su şəbəkəsinin istifadəyə verilməsi mərasimində iştirak edib.

Naxçıvanda şəhərdaxili su və kanalizasiya şəbəkəsinin tikintisi Azərbaycan ilə Asiya İnkişaf Bankı arasında kredit sazişinə əsasən həyata keçirilib. 2010-cu ilin mayında başlayan tikinti işləri yüksək səviyyədə yerinə yetirilib. Görülmüş işlər çərçivəsində 224.790 metr uzunluğunda şəhərdaxili su şəbəkəsi tikilib, 21.207 ev birləşməsində sayğaclaşma işləri görülüb. Şəbəkə üzərində 905 yanğın hidrantı quraşdırılıb. Bununla da Naxçıvan şəhər əhalisinin içməli suya tələbatı 100 faiz təmin olunub. Layihə çərçivəsində 219.040 metr uzunluğunda kanalizasiya xətləri çəkilib. Bu da 20.795 ev birləşməsini əhatə edib.

İlham Əliyev yenidən qurulmuş Babək rayonunun bir sıra yaşayış məntəqələrini birləşdirən, uzunluğu 16 kilometrə yaxın, eni 7,5 metr olan Şəkərabad - Babək qəsəbə - Nehrəm - Arazkənd dairəvi avtomobil yolunun açılışında iştirak edib

O həmçinin Naxçıvan Beynəlxalq Hava Limanının “Şərq Terminalı”nın yenidənqurmadan sonrakı vəziyyəti ilə tanış olub.Yenidənqurma işləri hava limanının sərnişin dövriyyəsini 2 dəfədən çox artıraraq saatda 150-200 nəfərdən 400-450 nəfərə çatdırılmasına imkan verəcək.

Həmin gün İlham Əliyev Naxçıvan Muxtar Respublika Xəstəxanasının açılışında iştirak edib. 8 mərtəbəli binada tibbin ən son yenilikləri tətbiq olunur. Əsaslı təmir və yenidənqurma işlərindən sonra 300 çarpayılıq olan xəstəxanada 14 stasionar şöbə fəaliyyət göstərir. Buraya travmatologiya, təcili və təxirəsalınmaz tibbi yardım, ümumi terapiya, nevrologiya, hematologiya, göz xəstəlikləri, burun-qulaq-boğaz, endokrin xəstəliklər, urologiya, cərrahiyyə, neyrocərrahiyyə, reanimasiya və reabilitasiya şöbələri daxildir. Xəstəxanada pulmonologiya, qastroenterologiya, hemodializ kimi 3 stasionar bölmə, həmçinin qəbul, radiologiya, laboratoriya, Konsultativ Diaqnostik Poliklinika, Mərkəzi Qan Bankı, Dərman Vasitələrinin Mərkəzləşmiş Analitik Ekspertiza Laboratoriyası şöbələri fəaliyyət göstərir.

Prezident İlham Əliyev Naxçıvana səfəri çərçivəsində şəhər 2 saylı uşaq musiqi məktəbinin açılışında da iştirak edib. Ümumi sahəsi 2540 kvadratmetr olan 4 mərtəbəli binada 300 şagird müxtəlif musiqi alətlərində ifaçılıq sənətinə, həmçinin milli və klassik musiqinin sirlərinə yiyələnəcək. Bunun üçün 4 şöbədə 7 ixtisas üzrə tədris aparılacaq.  -0—