Nardaranda etiraz aksiyası başa çatıb

  Nardaran ağsaqqalları etiraz aksiyasının iştirakçılarını dağılışmağa çağırandan sonra çoxgünlük aksiya başa çatıb. Ağsaqqallar bu qərarı noyabrın 29-da çoxsaylı müzakirələrdən sonra qəbul ediblər.

Təxribat və qarşıdurmaya yol verilməməsi məqsədəuyğun hesab edilib, belə ki, nəticədə yeni zorakılıq aktları, həbslər ola bilər. Nardaranın mərkəzi meydanında aksiyanın dayandırılması, qəsəbə daxilində yolların açılması qərara alınıb. 

Ağsaqqallar hesab edirlər ki, hər şeydən öncə noyabrın 26-da həlak olanların cəsədlərini almaq və dəfn mərasimini keçirmək üçün asayişi bərpa etmək lazımdır.

Bazar günü hakimiyyətlə danışıqlar aparmaq üçün nümayəndə təşkil edilib.

Aksiyanın dayandırılması barədə qərar elan edildikdən sonra meydanda adamların isinməsi və namaz qılması üçün  qurulan çadırlar sökülüb.

Lakin Nardarana gedən yollar əvvəlkitək polis tərəfindən əhatəyə alınıb. Bazar günü postlarda polis maşınları ilə yanaşı yüngül zirehli texnika da görünüb.

Qəsəbəyə yalnız qeydiyyatı olan şəxslər buraxılır.

Əvvəlkitək elektrik enerjisi yoxdur. Noyabrın 27-də elektrik enerjisi və stasionar telefon rabitəsi kəsilib. Yerli sakinlər ərzaq çatışmazlığından şikayətlənirlər. Belə ki,  ticarət  firmalarının avtomobillərinin qəsəbəyə girişi məhdudlaşdırılıb.

Noyabrın 26-da Nardaranda xüsusi əməliyyat keçirilib. Rəsmi məlumatlara görə, əməliyyat zamanı 14 dindar saxlanılıb. 2 polis işçisi və 5 dindar həlak olub.—0--