Narkotik ticarətçiləri ilə atışmada İran vətəndaşı öldürülüb

Bakı/05.04.22/Turan: Aprelin 4-də saat 20:45-də İran-Azərbaycan sərhədində insident qeydə alınıb, hadisə zamanı sərhədi pozanlardan biri öldürülüb.

Azərbaycan Dövlət Sərhəd Xidmətinin məlumatına görə, Cəbrayıl rayonunun Şıxalıağalı kəndi yaxınlığında6 nəfər silahlı naməlum şəxsin döv­lət sərhədini pozmaları müşahidə olunub.

Sərhəd pozucuları "Dayan!" əmrə tabe olmayıb, sərhəd naryadına qarşı od­lu silahdan atəş açaraq sərhədçilərin həyatına qəsdə cəhd ediblər. Cavab atəşi ilə sərhəd pozucularından biri öldürülüb, digərləri ərazinin sıx qamışlıq, havanın qaranlıq olmasından istifadə edərək ərazidən uzaqlaşmağa müvəffəq olublar.

Zərərsizləşdirilmiş sərhəd pozucusunun İran İslam Respublikasının vətəndaşı 1996-cı il təvəllüdlü Behnam Balai olması müəyyənləşdirilib. Onun yanında AKM tipli Kalaşnikov avtomatı, 3 ədəd bağlamada çəkisi 32 kiloqram 270 qram külli miqdarda narkotik vasitə aşkar olunub.

Hadisə yerindən uzaqlaşmış digər sərhəd pozucularının saxlanılması məqsədilə pilotsuz uçuş aparatlarının tətbiqi ilə xüsusi axtarış qruplarının həyata keçirdiyi intensiv tədbirlər nəticəsində sərhəd pozucularından biri -İİR vətəndaşı Məhəmməd Zarehi Tağı sərhəd­boyu zolaqda qamışlıq sahədə gizləndiyi yerdə aşkarlanaraq saxlanılıb.

Baş vermiş hadisə barədə İran tərəfi məlumatlandırılıb. Faktla bağlı cinayət işi açılıb. -02D-