Naxçıvanda sahibkarlar barəsində həbs-qətimkan tədbiri seçilib

Naxçıvanda kiçik sahibkarlar Məhəmməd Qurbanov və Nadir Məmmədov barəsində iki aylıq həbs-qətimkan tədbiri seçilib. 

M.Qurabanov və N.Məmmədov dekabrın 8-də Sədərək gömrük keçid məntəqəsində hakimiyyət nümayəndəsinə zor işlətməkdə ittiham olunurlar. N.Məmmədova qarşı Cinayət Məcəlləsinin 315.1 və 315.2, M.Qurbanova qarşı isə Cinayət Məcəlləsinin 315.1 maddələrilə ittiham irəli sürülüb. Dekabrın 11-də Sədərək rayon məhkəməsi hər iki şəxs barəsində həbs-qətimkan tədbiri seçib.   

Həbs olunan şəxslərin yaxınlarına məhkəmənin keçirilməsi tarixi və çıxarılan qərarlar haqqında heç bir məlumat verilməyib. Həbs olunanların yaxınları Turan-a bildiriblər ki, təkid etmələrinə baxmayaraq, dövlət tərəfindən təyin edilən vəkillər Adil Əsədov və Ələkbər Cəfərov apellyasiya şikayəti yazmaq istəmirlər.

M.Qurbanov Naxçıvanda fəaliyyət göstərən sahibkardır. Dekabrın 8-də Türkiyədən satış məqsədilə Naxçıvana gətridiyi 3 tondan çox qida məhsulları Sədərək gömrükxanasında saxlanılıb. Malların buraxılması üçün rüşvət və artıq rüsumlar tələb edilib. Hüquqlarının qorunması üçün sahibkar bölgədə fəsliyyət göstərən jurnalistlərə müraciət edib. Gömrük əməkdaşları hadisə yerinə gələn jurnalistlərin peşə fəaliyyətini yerinə yetirməsinə mane olublar. Hadisə yerinə gələn 40-da qədər şəxs hücum edərək, M.Qurbanovu, N.Məmmədovu döyərək xəsarət yetriblər. Jurnalistlərə məxsus texniki avadanlıqları zorla əllərindən alıblar. Dekabrın 8-də axşam M.Qurbanov və N.Məmmədov zorla polisə aparılıblar. -05D-