Şirvan Apellyasiya Məhkəməsi Əmiraslanovun işini tədqiq edir

Şirvan Apellyasiya Məhkəməsi iki il müddətinə həbs edilmiş “Kür” vətəndaş cəmiyyəti qərargahının fəalı İlham Əmiraslanovun şikayəti üzrə növbəti məhkəmə iclası keçirib.

Bu il sentyabrın 13-də Əmiraslanov Sabirabad rayon məhkəməsi tərəfindən qanunsuz silah saxlamaq ittihamı ilə (CM-in 221.1-ci maddəsi) həbs edilib, baxmayaraq ki, o özü və şahidləri məhkəmədə silahın onun üzərinə qəsdən atıldığını, işgəncə altında etirafedici ifadələr verməyə məcbur edildiyini bildirib. Həkimlər də Əmiraslanovun iki qabırğasının sındırıldığını və qulaq pərdəsinin zədələndiyini təsdiq ediblər.

Hakim Əhməd Nurməmmədovun sədrliyi ilə keçirilən bugünki prosesdə ATƏT, QHT və siyasi partiyaların nümayəndələri iştirak ediblər.

Hakim İctimai TV-nin məhkəmənin “Qanundan kənar” verilişində Əmiraslanovun həbsi haqqında süjetin sürətini təqdim etmək sorğusuna cavabını oxuyub. İTV bildirib ki, süjetin surətini təqdim edə bilməz, çünki onlar cəmi bir ay saxlanılır.

Məhkəmədə contact.az saytından Əmiraslanovun saxlanması əməliyyatının həvəskar videoçəkilişinə baxılıb. Bu videoyazı əməliyyatda ittiham tərəfin iddia etdiyi kimi iki polis əməkdaşının deyil, Mütəşəkkil Cinayətkarlığa qarşı Mübarizə Baş İdarəsinin çox sayda əməkdaşının və yerli polisin iştirak etdiyini sübut edir. 

Məhkəmə həmçinin Sabirabad rayon məhkəməsinin dinləməkdən imtina etdiyi iki şahidin ifadələrini dinləməyə hazır olduğunu bildirib. Bu, Əmiraslanovun qardaşı və müttəhimin saxlandığı avtomobilin sürücüsüdür. Amma işıqlar söndüyü üçün şahidləri dinləmək mümkün olmayıb.

Müdafiə tərəfi həmçinin Əmiraslanovun saxlanmasında iştirak edən və ona işgəncə edən Sabirabad rayon polis rəisinin keçmiş müavini Rauf Məcidovun, habelə MCMBİ-nin iki əməkdaşının və iki şahidin məhkəməyə çağırılması haqqında vəsatət qaldırıb. 

Məhkəmədə İlham Əmiraslanov yenidən işin saxtalaşdırıldığını bildirib və başında və bədənində ağrıların davam etməsindən şikayətlənib. Növbəti məhkəmə iclası yanvarın 16-na təyin edilib. -0-