Nazim Bəydəmirli Ədliyyə Nazirliyini məhkəməyə verib

Bakı/04.06.21/Turan: “Bəydəmirli Xeyriyyə Fondu” qeyri-hökumət təşkilatının  təsiscisi Nazim Bəydəmirli Ədliyyə Nazirliyini məhkəməyə verib. O, məhkəmədən xahiş edir ki, Ədliyyə Nazirliyindən onun təşkilatının qeydə alınmasını tələb etsin.

İddiaçı Turan agentliyi ilə söhbətində bildirib ki, bundan öncə Ədliyyə Nazirliyi qeydiyyatdan imtina edib, bunu təqdim olunmuş sənədlərin "Qeyri-hökumət təşkilatları haqqında" Azərbaycan qanununun tələblərinə uyğun olmaması ilə əsaslandırıb. Bu, cari yanvar ayında olub. Baydəmirli qeyd olunan səhvləri düzəldərək yenidən sənədlərini təqdim edib, amma yenə də imtina ediblər. Bu dəfə deyilib ki, sənədlər bütün təsisçilər tərəfindən imzalanmayıb və notariat qaydasında təsdiqlənməyib.

Növbəti düzəlişlərdən sonra sənədlər üçüncü dəfə təqdim olunub, lakin onlar yenidən yeni bəhanə ilə qaytarılıb.

“Ədliyyə Nazirliyi Qeydiyyat və Notariat Baş İdarəsi “Bəydəmirli Xeyriyyə Fondu”nun dövlət qeydiyyatına alınmasından əsassız olaraq imtina edir. Hər dəfə müraciət zamanı fərqli səbəblərlə sənədlərimizi geri qaytarır. Halbuki, nöqsanların aradan qaldırılması üçün sənədlərin geri qaytarılmasına heç bir ehtiyac yoxdur. Təsisçi olaraq bizimlə telefon və digər əlaqə vasitələri ilə mübahisəli məsələni aydınlaşdırmaq mümkün olar”, - Nazim Bəydəmirli məhkəməyə ünvanladıgı ərizədə yazıb.

O hesab edir ki, Ədliyyə Nazirliyi qəsdən Fondun dövlət qeydiyyatından imtina edir.

Qeyd edək ki, bu problem illərdir siyasi motivlərlə qeydiyyatdan keçə bilməyən onlarla qeyri-hökumət  təşkilatı üçün mövcuddur. Hakimiyyətin siyasəti ancaq hökumətyönlü qeyri-hökumət  təşkilatlarını qeydiyyatdan keçirməkdən ibarətdir ki, onlar da faktiki olaraq hakimiyyət üçün çalışırlar.

Beynəlxalq təşkilatlar, o cümlədən Avropa Şurası və ATƏT bu problemin həll edilməsinin və siyasi yönündən asılı olmayaraq, bütün qeyri-hökumət təşkilatlarının qeydiyyata alınmasının vacibliyi məsələsini illərdir ki, Azərbaycan hökuməti qarşısında qaldırır. -0-