"Neftçi"nin azarkeşləri xuliqanlığa görə həbs olunub

Martın 4-də "Neftçi" futbol klubunun iki azarkeşi həbs olunub.

Onlar "Neftçi - Qarabağ" oyunundan sonra azarkeşlik etdikləri klubun məğlubiyyətinə etiraz ediblər.

Sosial şəbəkələrdə yayılan videolardan görünür ki, fanatlar "Neftçi" futbol klubunun inzibati binasının önünə gələrək, "klub düzəlməlidir, düzəlməsə daha pis şeylər olacaq", deyib binanın həyətinə pirotexnik vasitələri atıblar.

Daxili İşlər Nazirliyinin mətbuat xidmətindən Turan-a bildirilib ki, polis əməkdaşları tərəfindən ictimai asayişi pozan şəxslər - Arif Dadaşov, Ceyhun Quliyev, Vasif Rzayev və Sabir Nəzərov müəyyən olunaraq saxlanılıblar.

Qeyd olunub ki, məhkəmənin qərarı ilə A.Dadaşov 30, C.Quliyev 15 sutka inzibati qaydada həbs olunublar, digər iki nəfər isə cərimə edilib.

"Neftçi" FK də hadisə ilə bağlı açıqlama yayıb. Açıqlamada deyilir ki, baş verən hadisə ilə bağlı "Neftçi" heç bir şikayət bildirməyib: "Hüquq-mühafizə orqanları qanunvericiliyin tələblərinə əsasən həmin şəxsləri məsuliyyətə cəlb etmişdir".

Məsələ ilə bağlı həbs olunmuş şəxslərdən və onların vəkillərindən münasibət öyrənmək mümkün olmayıb.