Nəsib Piriyev Azərbaycan Beynəlxalq Bankında krediti olduğunu təkzib edir

Londonda olan sahibkar Nəsib Piriyev Azərbaycan Beynəlxalq Bankına hər-hansı borcu olduğunu təkzib edən bəyanat yayıb.

Onun Turan agentliyinə daxil olmuş bəyanatında deyilir ki, "o, son vaxtlar Azərbaycanda yayılan əsassız məlumatlara aydınlıq gətirmək istəyir".

Azərbaycan hakimiyyəti tərəfindən adı İnterpol siyahısına salındığı bir halda Nəsib Piriyev məhkəmədən gizlənməyib. Hazırda o, bu əsassız addımı ləğv etmək üçün vəkillə işləyir, deyə bəyanatda qeyd edilir.

"Hazırda ailəsi ilə birlikdə Londonda olan Nəsib Piriyev təqibi üçün hər-hansı əsas olduğunu qətiyyətlə təkzib edir. Nə cənab Piriyevin, nə cənab Piriyevə məxsus istənilən şirkətin Azərbaycan Beynəlxalq Bankında tərəfindən verilmiş hər-hansı krediti yoxdur", deyə bəyanatda qeyd edilir.

Sonda Piriyev "yalan ittihamlar yayaraq və ya böhtan məqalələr dərc edərək onun işgüzar nüfuzuna ziyan vuranları" məhkəmə ilə hədələyir.

Xatırladaq ki, Nizami Piriyev - Nəsib Piriyevin atası bu ilin mayında saxlanılan və DİN-in Mütəşəkkil Cinayətkarlığa qarşı Mübarizə Baş İdarəsində bir neçə gün keçirən böyük sahibkarlar arasında idi. Bunun səbəbi ABB-yə kredit borclarıdır. Kreditin məbləği rəsmi olaraq elan edilməyib, amma şayiələrə görə, 500-800 mln. dollar təşkil edir. Bu vəsaitlə Bakı yaxınlığında ata və oğul Piriyevlərin rəhbərlik etdiyi AzMeCo şirkətinə məxsus Metanol zavodu tikilib. -02В-