Nicat Abdullazadə: Mənim ölkədən çıxışıma qadağa qoyanları məhkəməyə verəcəyəm

Bakı/19.09.19/Turan: Azərbaycan Xalq Cəbhəsi Partiyasının fəalı Nicat Abdullazadə sentyabrın 19-da Bakı hava limanından xarici ölkəyə buraxılmayıb.

"Hava limanında Dövlət Sərhəd Xidmətinin əməkdaşı ölkədən çıxışıma qadağa qoyulduğunu bildirib. Bir gün öncə Ədliyyə Nazirliyinin rəsmi saytından ölkədən giriş-çıxışımı yoxladığım zaman heç bir qadağa olmadığı göstərilmişdi", deyə Abdullazadə Turan-a bildirib.

O, sentyabrın 21-də mühacirlərin təsis etdiyi hazırki iqtidara müxalif olan AND təşkilatının Almaniyanın Frankfurt şəhərində keçiriləcək qurultayında iştirak etmək üçün gedirdi.

"Mənə bildirdilər ki, problemli kreditlərlə bağlı ölkədən çıxışıma qadağa qoyulub. Amma bu qadağanın qoyulması yanlışdır. Çünki prezidentin 2019-cu ildə imzaladığı problemli kreditlərlə bağlı sərəncamından sonra bu problem aradan qaldırılıb. Bu gün bank mənə hər hansı problemin olmaması barə sənəd verdi və sənədi müvafiq quruma təqdim etdim. Söz verdilər ki, ölkədən çıxışıma qadağa iki saat ərzində aradan qaldırlacaq", deyə Abdullazadə bildirib.

O, ölkədən çıxışına qadağa qoyanlarla və dəymiş ziyanla bağlı məhkəməyə müraciət edəcəyini bildirib.

Nicat Abdullazadə AXCP fəallarındandır. O, bu il martın 7-də məhkəmənin qəraraı ilə 15 sutka inzibati həbsə məhkum edilib.
AXCP siyasi fəalla bağlı baş verənləri siyasi sifariş hesab edir.

"Siz Nicat bəyin ölkədən çıxışına qeyri-qanuni olaraq qadağa qoya bilərsiniz, ancaq onun vətən sevgisinə, əsl vətəndaş mövqeyinə, mübarizə əzminə, ölkənin gələcəyi üçün apardığı ardıcıl və prinsipial mübarizəsinə əngəl ola bilməzsiniz!", deyə AXCP sədr müavini Gözəl Bayramlı bildirib.

Azərbaycan rəsmiləri insanların dinc siyasi fəaliyyətlərinə görə təzyiq və həbslərlə üzləşməsi ilə bağlı deyilənləri qəbul etmir. -03B-