Açiq mənbələrdən foto.

Açiq mənbələrdən foto.

Bakı/03.06.20/Turan: Azərbaycan Xalq Cəbhəsi Partiyasının (AXCP) fəalı Niyaməddin Əhmədov terrorizmin maliyyələşdirilməsilə bağlı ittihamı rədd edir. Bu barədə onun atası Arif Əhmədov bildirib.

AXCP üzvü, bu partiyanın  lideri Əli Kərimlinin ictimai əsaslarla mühafizəçi olan Niyaməddin Əhmədov aprelin 16-da İnzibati Xətalar Məcəlləsinin 211 (karantin rejiminin pozulması) və 535-ci (polisin qanuni tələbinə tabe olmamaq) maddələri ilə həbs edilib.

AXCP nümayəndələrinin sözlərinə görə, aprelin 28-də həbsdə saxlanılarkən onu DİN-in Binəqədi təcridxanasından başqa müəssisəyə aparıblar və partiya lideri Əli Kərimliyə qarşı ifadə almaq məqsədilə işgəncələrə məruz qoyublar.

DİN mətbuat xidməti bu məlumatı “uydurma” adlandırıb.

Mayın 16-da inzibati həbs müddəti başa çatdıqdan sonra N.Əhmədova qarşı CM-in 214-1-ci (terrorizmin maliyyələşdirilməsi) maddəsi ilə ittiham irəli sürülüb.

DTX və Baş Prokurorluğun mətbuat xidmətlərinin birgə bəyanatına əsasən Almaniyada sığınacaq almış Azərbaycan vətəndaşı Habil Məmmədov Azərbaycanda terror aktlarının hazırlanması məqsədilə Əhmədova pul göndərib.

AXCP-də bu ittihamları qondarma və siyasi motivli adlandırıblar.

Fəalın atası Arif Əhmədov da oğluna qarşı ittihamı absurd adlandırıb.

“Bu ittihamın oğlum ilə heç bir əlaqəsi yoxdur. Çünki onun həyat baxışlarına və əqidəsinə uyğun deyil. Mən buna inana bilmirəm”, - Ə.Əhmədov bildirib.

Onun sözlərinə görə, bu, N.Əhmədovu tanıyan hər kəsə, qohum, həmkəndlilər, tanışlara pis təsir edib.

“İnsanlar bizim evimizə gəlirlər və bildirirlər ki, ittihamın doğru olduğuna inanmırlar”, - Ə.Əhmədov deyib.

O hesab edir ki, oğlunun həbsi onun siyasi fəaliyyəti və AXCP-yə üzvlüyü ilə bağlıdır.

“Niyaməddin AXCP üzvüdü, Əli Kərimlinin mühafizəçisidir, ona inanan adamdır. Biz oğlumun günahını ancaq bununla əlaqələndiririk. Ona qarşı ittihamı Niyaməddinin Əli Kərimliyə yaxın olmasında, ona inanması ilə əlaqəli olmasında görürük. Ayrı bir səbəb ola bilməz. Niyaməddin hər cəhətdən vətənpərvərdir, vətənə layiq oğuldur”, - o bildirib.

O qeyd edib ki, N.Əhmədovu işgəncələrə məruz qoyublar.

“Niyaməddini Qabil Məmmədov ilə birləşdirən onların həmkəndli olmasıdır. Biz bir kənddə yaşamışıq, amma qonşu deyildik, onların arasında əlaqə, ünsiyyət olmayıb”, - Ə.əhmədov qeyd edib.

O həmçinin bildirib ki, doğmalarına N. Əhmədovla nə görüş verirlər, nə də telefon danışığı.

“Niyaməddin aprelin 15-dən həbsədir. Yalnız iyunun 2-də həbs yerində ona paltar və yemək keçirə bilmişəm. Ancaq nə görüşə, nə də telefon əlaqəsinə imkan vermirlər. İmkan vermirlər ki,  bir dəfə görüşüb dərdimi deyəm, bir məlumat alam, görəm ki, sağdırmı, vəziyyəti necədir. Ancaq bilirik ki, ona qarşı dəfələrlə işgəncələr olub. Mənə çatan məlumata görə, hətta böyrəklərinə qan sızıb”, - ata bildirib.

O, ölkə rəhbərliyini müdaxilə etməyə və oğlunun azad olunmasını təmin etməyə çağırıb.

“Oğluma işgəncə verərək ittihamı boynuna qoymaq istəyirlər. Əgər bir işi etməyibsə, necə boynuna ala bilər? Prezidentə çağırışım odur ki, məmurlarına desin, işə düzgün baxsınlar. Oğlumun azadlığını təmin etsinlər”, - Arif Əhmədov deyib. -03B06-

 

Rəy yaz

Cəmiyyət

İran Prezidentinin də həlak olduğu helikopter qəzasına görə məsuliyyəti kim daşıyır? – Sədrəddin Soltan Çətin sualda



Bizi sosial şəbəkələrdə izləyin

Xəbər lenti