Ölkə vətəndaşlarının mülkiyyət hüquqlarının kütləvi şəkildə pozulması davam edir

Səbayel rayonu, Mikayıl Hüseynov küçəsi, 15-də yerləşən  9 mərtəbəli, 72 mənzilli binanın sakinləri çərşənbə günü RATİ-də mətbuat konfransı keçiriblər.

Bina sakini Arzu Babayeva bildirib ki, 2013-cü ilin noyabrında Fövqəladə Hallar Nazirliyi (FHN) binanın qəzalı olması haqda akt hazırlayıb, amma bu akt sakinlərə göstərilməyib. Onun sözlərinə görə, FHN əməkdaşları binanın qəzalı olması haqda aktı “binaya uzaqdan baxış” keçirilmələri nəticəsində tərtib ediblər. Sakinlər bunu da qeyd ediblər ki, elə FHN 2012-ci il “Eurovision” müsabiqəsi öncəsi binanın qəzalı olmaması barədə akt hazırlayıb.

Binanın yararsız olması haqda akt tərtib olunduqdan bu yana Səbayel Rayon İcra Hakimiyyətinin nümayəndələri gələrək mənzillərin boşaldılmasını tələb edirlər. Bundan əlavə, polis sakinlərə təzyiq edir. Binanı xoşluqla tərk etmədikləri halda “biabırçılıqla” çıxarılacaqları ilə hədələyirlər. Boş qalan mənizllərə girən naməlum şəxslər mənzillərin divarlarına ağır alətlərlə zərbələr vuraraq “yararsız” olması “görüntü” yaradırlar. Bunanın artıq dam örtükləri dağıdılır. Yağış yağacağı halda bunanın 9-cu mərtəbəsindəki mənzillər suya batacaq. Bu qanunsuzluqlar barədə bütün instansiyalara müraciət etsələr də onlara cavab verilmir. Hətta Səbayel Rayon İcra Hakimiyyətinin təmsilçiləri yaxın vaxtlarda mənzilləri boşaltmadıqları halda mənzillərə qaz, su və işıq verilməsinin dayandırılacağı barədə hədə-qorxu gəliblər.

Sakinlərin sözlərinə görə, mənzillərin hər kvadratına 1500 manat kompensasiya təklif edilir. Amma sakinlər bununla razı deyil. Belə ki, şəhərin mərkəzində, həm də dənizə yaxın bir binada yaşadıqlarını əsas gətirən sakinlər həmin əraziyə yaxın yerdə evlə təmin olunmağı tələb edilər. Bu olmasa, dənizə yaxın binalardan mənzil ala bilmək üçün yüksək məbləğdə kompensasiya istəyirlər.     

Baş verən qanunsuzluqları dayandırmaq üçün vəkil Emin Abbasov artıq Bakı 1 saylı İqtisadi-İnzibati Məhkəməsinə müraciət edib və ilk məhkəmə baxışı martın 13-nə təyin edilib.

Xatırladaq ki, 2006-cı ildən bu yana Bakıda vətəndaşlara məxsus ev və mənzillərin sökülməsi kütləvi hal alıb. Bu zaman hər şey heç də tərəflər arasında qarşılıqlı anlaşma nəticəsində baş vermir. Füzuli, Ş.Bədəlbəyli küçələrində və digər yerlərdə vətəndaşların mənzilləri zor gücünə dağıdılaraq evlərindən çıxarılıblar. Hazırda Bakının tarixi “Sovetski” məhəlləsini də bu aqibət gözləyir. Bütün qarşıdurmalar hökumətin təyin etdiyi 1500 manat üzərində qurulur. Hökumət vətəndaşa ədalətli kompensasiya ödənilməsi təklifini qəbul etmir.-05C-