Ötən il quduzluq xəstəliyi problemi olub

2012-ci ildə ölkədə quduzluğa görə narahatçılıq olsa da, xəstəliyi nəzarətdə saxlamaq üçün Dövlət Baytarlıq Xidməti heyvanlar arasında vaksinasiya tədbirləri həyata keçirib. Bu barədə Kənd Təsərrüfatı Nazirliyi yanında Dövlət Baytarlıq Xidmətində (DBX) “2012-ci ilin yekunlarına və cari ildə qarşıda duran vəzifələrə dair” dünən keçirilən müşavirədə xidmətin rəisi Sialə Rüstəmova bildirib. 

Onun sözlərinə görə, ötən il quduzluq xəstəliyini aşkar etmək üçün 56 nümunədə laboratoriya müayinəsi aparılıb. “Onlardan yalnız 18-i müsbət olub. Xəstəlik törədicisi aşkar olunan nümunələrin göndərildiyi ərazilərdə lazımi profilaktik tədbirlər həyata keçirilib, xəstəliyin vaxtında qarşısı alınıb”, deyə o qeyd edib.

Xidmət rəisi bildirib ki, hazırda iti yoluxucu xəstəliklərə görə Azərbaycanda epizootik vəziyyət sabitdir.

S.Rüstəmova deyib ki, son üç ildə görülən işlərin nəticəsi olaraq ölkədə heyvanların brusellyoza yoluxma faizinin azalmasına nail olunub. 

“Düzdür, hələ bu sahədə problemlər tam həllini tapmayıb. Nəzərə alsaq ki, 2002-2003-cü illərdə 650-700 insan brusellyoz xəstəliyinə yoluxurdusa, hazırda bu göstərici 50 faizə yaxın aşağı enib. Amma bu, yenə də bizi qane etmir, istəyirik ki, insanların brusellyoza yoluxma faizi sıfıra endirilmiş olsun”.

Xidmət rəisi 2012-ci ildə ölkədə quş qripinə təsadüf edilmədiyini deyib. “Ötən il ərzində 4 dəfə monitorinq aparılıb. Ölkə ərazisində həm çöl, həm də ev quşlarına görə aparılan monitorinqlər zamanı götürülmüş 6 mindən artıq nümunə Respublika Baytarlıq Laboratoriyasında müayinə edilib. Nümunələrdə quş qripi xəstəliyinin törədicisinə təsadüf edilməyib”, o bildirib. -03D-