Pamirin ən yüksək zirvələrindən birində Azərbaycan bayrağı qaldırılıb

Iyulun 19-da Azərbaycan Alpinizm Federasiyasının üzvləri İsmayıl Əsgərov və Rüfət Qocayev Pamirin 7134 m yüksəklikdəki Əbu İbn Sina (keçmiş Lenin) zirvəsini uğurla fəth ediblər.
Ekspedisiya Azərbaycanın məşhur dövlət xadimi, Qarabağ xanlığının banisi Pənah xanın xatirəsinə həsr edilmişdi, bu barədə Turana Federasiyanın prezidenti idman ustası İsrafil Aşurlu bildirib.
Ekspedisiya Azərbaycan Respublikasının Gənclər və İdman Nazirliyi və Milli Alpinizm Federasiyası tərəfindən Heydər Əliyev Fondunun dəstəyi ilə təşkil edilib.
İyulun 7-də alpinistlər 3600 metr yüksəklikdəki baza düşərgəsinə çatıblar. İqlimləşmə və yüksəklikdə düşərgələrin salınması bir həftədən çox vaxt alıb. Həmlə düşərgəsi 6000 metr yüksəklikdə qurulub.
5 min metr yüksəklikdən etibarən yağan güclü qar fəthi çətinləşdirib. Zirvənin fəth edildiyi gün də hava şəraiti əlverişsiz və qeyri-sabit olub. Belə ki, ayın 18-də alpinistlər həmlə düşərgəsinə çıxaraq, səhər tezdən həmləyə başlamağı planlaşdırırdılar. Lakin güclü külək və duman qrupun çıxışını bir neçə saat gecikdirib. Hava şəraitinin əlverişsiz və zamanın qeyri-məhdud olmasına baxmayaraq, İsmayıl Ələkbərov həmləyə keçməyi qərara alıb.
Dizə qədər qarda özlərinə yol açan alpinistlər hərəkət ediblər və saat 16 radələrində zirvəyə çataraq, Azərbaycanın milli bayrağını orada qaldırıblar.
Gecə idmançılar baza düşərgəsinə qayıdıblar və hazırda oradadırlar. Alpinistlərin vəziyyəti yaxşıdır.
Bu hadisə ilə bağlı Turana şərh verən Azərbaycan Alpinizm və Qayayadırmanma Federasiyasının rəyasət heyətinin üzvü, ölkənin ən yaşlı alpinistlərindən biri olan Rasim Cəfərov bildirib ki, Azərbaycan alpinistləri üçün bu dağ ən çox fəth olunan 7000 metrlik zirvələrdən biridir.
Alpinizm Federasiyası müxtəlif illərdə bu zirvəyə 7 ekspedisiya həyata keçirib. Keçən ilki ekspedisiya xüsusi əhəmiyyət kəsb edib, belə ki, Azərbaycanın alpinizm üzrə yığmasının üzvləri şimaldan son 15 ildə cəmi bir dəfə keçilən Arkina zirvəsinə doğru daha çətin marşrut keçiblər.
Həmin ekspedisiya dahi Azərbaycan bəstəkarı və publisist Üzeyir Hacıbəylinin xatirəsinə həsr olunmuşdu.
Bu ilki ekspedisiya hazırlıq xarakteri daşıyırdı və avqustda Pamir və Tyan-Şanın daha yüksək zirvələrinə keçiriləcək üç ekspedisiya ərəfəsində baş tutub.
Belə ki, Rüfət Qocayev yığma komandanın tərkibində Pamirin iki yüksək zirvəsinin - Korjenevskaya (7105 m) və Samoni (7495) (keçmiş Kommunizm zirvəsi) zirvələrinin fəthinə yollanacaq, İsmayıl Əsgərov isə Bakıya qayıdacaq və Tyan-Şanın ən yüksək zirvəsinə - Qələbə zirvəsinə (7390 m) ekspedisiyaya hazırlaşacaq.
Əsrin son rübündə İbn Snia zirvəsini fəth edən azərbaycanlı alpinistlərin siyahısı:
1989 – Emma Orucəliyeva, Boris Datskovski, Valeri Allahverdiyev, Saridan Mursaqulov;
2003 – Akif Rüstəmov;
2004 – İsrafil Aşurlu;
2011 – Mir Bədəl Mir-Həsənli, Denis Leusov, Rüfət Qocayev, Firuz Dadaşov, Sirxan Məmmədov.
Bu dağ ilk dəfə 1928-ci ildə alman alpinistləri tərəfindən fəth edilib. Bu gün zirvəyə 9-u cənub yamacından, 7-si şimal yamacından olmaqla, 16-dan çox marşrut çəkilib. -02В-