Paytaxt polisi məhkəmənin sorğusuna cavab vermir: Müsavat Partiyası fəalının məhkəməsində

Bakı/08.07.19/Turan: Bazar ertəsi Bakı Ağır Cinayətlər Məhkəməsində hakim İradə Həsənovanın sədrliyi ilə Müsavat Partiyasının fəalı Azad Həsənovun cinayət işi üzrə proses davam edib.

Müsavat Partiyasının başqanı Arif Hacılı, AXCP sədri Əli Kərimli, Müsavat Partiyasının keçmiş sədri İsa Qəmbər, ictimai-siyasi fəallar prosesi izləyiblər.

Hakim bildirib ki, vəkil Osman Kazımovun vəsatəti əsasında Bakı Şəhər Baş Polis İdarəsinə (BŞBPİ) göndərilmiş sorğuya cavab verilməyib. Sorğuda 2018-ci il oktyabrın 11-də A.Həsənovun həbs edildiyi gün Bakı Şəhər Baş Polsi İdarəsinə gəlib-gedənlərin qeydiyyat aparılan jurnalın surətinin məhkəməyə təqdim olunması xahiş edilir.

"Deyirlər məhkəmə islahatı aparılır. Əgər polis məhkəmənin adi bir sorğusuna cavab vermirsə, bu, necə islahatdır?", - O.Kazımov hakimə müraciət edib.

Vəkil polis əməkdaşlarının A. Həsənovun saxlanılması ilə bağlı dərhal ailəsinə xəbər verilməsi barədə məhkəməyə yalan ifadə verdiklərini hakimin diqqətinə çatdırıb.

Buna sübut kimi A. Həsənovun DİN "102 Zəng Mərkəzi"nin əməkdaşı ilə 3 telefon danışığı səsləndirilib. "102-Zəng Mərkəzi"nin əməkdaşı A. Həsənovun saxlanmasından 6 saat sonra onun qardaşının zənginə bu barədə BŞBPİ-yə, ailəyə isə onun taleyi barədə məlumat çatdırılacağını desə də bu, baş verməyib. A.Həsənovun qardaşı daha sonra iki dəfə 102 xidməti ilə əlaqə saxlasa da məlumat ala bilməyib.

"Qardaşım üçüncü dəfə zəng etdiyi vaxt artıq məhkəmə mənim barəmdə həbs- qətimkan tədbiri seçmişdi. Amma ailəmə bu barədə hər hansı məlumat verilməyib", -A. Həsənov qeyd edib.

Proses iyulun 15-də davam edəcək.

A.Həsənov məhkəmə zalında Turan-ın müxbirinə bildirib ki, ona qarşı ittiham "böhtan və yalandır". O deyib ki, özünü yaxşı hiss edir, saxlanma şəraitindən şikayəti yoxdur.

A.Həsənov qeyd edib ki, "Xeyriyyə marafonu"nu dəstəkləyir və müxalifətçi fəalların cərimələrinin ödənilməsi üçün vəsait yığılması məqsədilə qohumları vasitəsilə pul verəcək.

*Azad Həsənov 2014-cü ildən Litvada mühacirətdə yaşayıb. Ağır xəstə olan atasını görmək məqsədilə 2018-ci il oktyabrın 11-də Bakıya gəlib. Elə həmin gün atasının yaşadığı Hövsan qəsəbəsində saxlanılıb. Ona qarşı CM-in 234.4.3-cü maddəsi (külli miqdarda narkotik maddənin qanunsuz dövriyyəsi) ilə ittiham irəli sürülüb. Hüquq müdafiəçiləri onu siyasi məhbus kimi tanıyıblar. 03B06--