Polis «qara bazarda» dollar satanları saxlayıb

Polis ayrı-ayrı şəxslər tərəfindən qanunsuz valyuta mübadiləsi əməliyyatlarının aparılmasına qarşı xüsusi əməliyyat tədbirlərini davam etdirir.

Daxili İşlər Nazirliyinin mətbuat xidmətinin məlumatına görə, Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsi Bakının Xətai rayonu ərazisində yerləşən kafelərdən birində əməliyyat-axtarış tədbiri həyata keçirib.

Nəticədə həmin obyektdə qanunsuz valyuta mübadilə fəaliyyəti ilə məşğul olan Masallı rayon sakini Elnur Əkbərov, paytaxt sakinləri Fərhad Məhərrəmov və Vüsal Mikayılov 52 min ABŞ dollarını 96 min 200 manata satan zaman saxlanılıb.

Onların üzərinə baxış zamanı əlavə olaraq, ümumilikdə, 13 min 920 ABŞ dolları məbləğində pul vəsaiti aşkar olunub.       

Faktla bağlı Baş İdarənin istintaq şöbəsində araşdırmalar davam etdirilir.

 Elə həmin gün Sumqayıt Şəhər Polis İdarəsi şəhərin 32-ci məhəlləsində yerləşən ticarət mərkəzinin ərazisində qanunsuz valyuta mübadiləsi fəaliyyəti ilə məşğul olduqlarına görə 4 nəfəri - Fərmayıl Hacıyev, Xəqani Albandayev, Azər Məmmədov, İsfəndiyar Nağıyevi saxlayıb.

Tədbirlərin davamı olaraq bu fəaliyyətlə məşğul olan daha bir şəhər sakini  İsmayıl Balayev də saxlanılıb.       

Həmin şəxslərin barəsində Azərbaycan Respublikası İnzibati Xətalar Məcəlləsinin müvafiq maddəsi ilə protokollar tərtib olunub və onlar  cərimə ediliblər.

Daxili İşlər Nazirliyi vətəndaşlara xəbərdarlıq edərək bildirir ki, ölkənin maliyyə sisteminin sabit və dayanıqlılığına, maliyyə bazarlarının fəaliyyətinin səmərəli şəkildə təmin olunmasına qarşı fəaliyyət göstərən şəxslərlə mübarizə tədbirləri bundan sonra da davam etdiriləcək.       

Odur ki, qanunsuz olaraq valyuta mübadiləsi ilə məşğul olan şəxslərin bu hüquqazidd əməllərdən çəkinmələri tələb olunur. -03D-