Polis təmkin nümayiş etdirib - DİN-in rəsmi məlumatından (yenilənib)

Bakı/08.06.20/Turan: DİN-in mətbuat xidməti günorta saatlarında bu gün paytaxtın Yeni Yasamal qəsəbəsində sakinlərin saxlanılması haqqında məlumat yayıb.

Dünən karantin rejimini pozan şəxsi saxlayan polis əməkdaşlarının üzərinə müxtəlif əşyalar ataraq onların ünvanına təhqiredici ifadələr səsləndirən 11 nəfər saxlanılıb.

"Polis əməkdaşları təmkin nümayiş etdirmiş və karantin rejimini pozan həmin şəxs barəsində inzibati tədbir görmüşlər. Aparılan araşdırmalarla asayiş keşikçilərinin üstünə müxtəlif əşyalar atan 11 nəfərin də şəxsiyyəti müəyyən edilmiş və onlar saxlanılaraq müvafiq araşdırmalar aparılması üçün ərazi polis orqanına gətirilib.

Hazırda onların törətdikləri əmələ hüquqi qiymət verilməsi üçün zəruri araşdırmalar davam etdirilir". -16D-

*   *   *

2020 İyun 08 (Bazar ertəsi) 12:39:40

Xüsusi təyinatlı polis dəstəsi Yeni Yasamalda dinc sakinlərə qarşı

Bakı/08.06.06/Turan: İyunun 8-də səhər saatlarından etibarən DİN-in çevik polis alayının çoxsaylı qüvvələri paytaxtın Yeni Yasamal massivinin sakinlərinə qarşı xüsusi əməliyyat keçirib. Belə ki, polis Dadaş Bünyadzadə küçəsi, 13 ünvanında çoxmənzilli evin sakinlərini saxlayıb.

Dünən bu həyətdə sakinlər karantin rejimini pozan sakinlərdən birini saxlayan polislərə zibil atıb. Bu gün isə polis dünən onların əməllərinə etiraz edənləri saxlamaq qərarına gəlib.

Polislər mənzillərə daxil olaraq insanları residivist kimi tutub küçəyə çıxarıblar. Bina sakinləri balkonlardan qışqıraraq, baş verənləri telefonları ilə çəkib sosial şəbəkələrə yerləşdiriblər. Kadrlardan göründüyü qədər, ən az 10 nəfər saxlanılıb.

DİN-in mətbuat xidmətindən şərh verməkdən imtina ediblər. -06D-