Qafqaz Universitetinin əmlakı «milliləşdirilir»

Təhsil Nazirliyinin yanvarın 30-da keçirilən növbədənkənar kollegiya iclasında Qafqaz Universitetinin ləğvetmə komissiyasının təqdim etdiyi təkliflər əsasında tələbə kontingentinin digər universitetlərdə yerləşdirilməsi məsələsi müzakirə olunub.

Müzakirələr nəticəsində irəli sürülmüş bir neçə təklif arasında qış imtahan sessiyasından sonra bütün tələbələrin bir universitetdə - Azərbaycan Respublikası prezidentinin 2016-cı il 8 noyabr tarixli sərəncamı ilə dövlət universiteti statusunda yaradılmış Bakı Mühəndislik Universitetində öz ixtisasları üzrə yerləşdirilməsi variantı qəbul edilib.

Digər ali təhsil müəssisələrində təhsillərini davam etdirmək istəyən tələbələrin müraciətlərinə yay tətili zamanı baxılacaq, bu barədə Təhsil Nazirliyinin məlumatında qeyd olunur.

Həmçinin, Qafqaz Universitetinin təsisçisi - Azərbaycan Beynəlxalq Təhsil Kompleksinin Azərbaycan Hökumətinə və Təhsil Nazirliyinə universitetin ləğvindən sonra qalan tədris kompleksinin bütün əmlakının dövlət nəfinə qəbul edilməsi və onun təhsil məqsədləri üçün istifadə olunması barədə müraciəti nəzərə alınıb.

Qafqaz Universitetinin problemləri 2016-cı ilin yayında Türkiyədə uğursuz dövlət çevrilişi cəhdindən sonra başlayıb. Ankara Bakıdan Türkiyə hökumətinin qiyamın təşkilatçısı elan etdiyi ilahiyyatçı Fətullah Gülənin “Hizmet” hərəkatı ilə əlaqəsi olan bütün qurumların bağlanmasını tələb edib.

Bundan sonra “Hizmet” hərəkatının yaratdığı Qafqaz Universiteti məcburi olaraq SOCAR nəzdində Bakı Neft Məktəbinin tərkibinə keçirildi. Eyni zamanda, Türkiyədən olan müəllimlər işdən çıxarıldı, rəhbərliyə yeni kadrlar təyin edildi. 2017-ci il yanvarın 16-da isə Qafqaz Universiteti ləğvini elan etdi.

Qeyd edək ki, bu universitet Azərbaycanda beynəlxalq nüfuzu olan ən yüksək reytinqli ali məktəblərdən biri idi. Bu ali məktəbdə Azərbaycan vətəndaşları ilə yanaşı, əcnəbilər də təhsil alırdı. -06D-