Freedom House yenidən Azərbaycanı qeyri-azad ölkə kimi tanıyıb

Freedom House hüquq müdafiə təşkilatı dünyanın 195 ölkəsində siyasi və vətəndaş azadlıqlarının səviyyəsi haqqında ənənəvi hesabatını açıqlayıb.

Bu ölkələrdən 87-si azad, 59-u qismən azad və 49-u qeyri-azad ölkə kimi tanınıb.

Azərbaycan artıq ardıcıl olaraq neçənci ildir ki, qeyri-azad ölkələr sırasına aid edilir. Ötən 10 ildə Azərbaycanda vəziyyət yalnız pisləşir, deyə hesabatda bildirilir.

Konstitusiyaya dəyişikliklər haqqında ötən ilki referendum İlham Əliyevin şəxsi hakimiyyətinin möhkəmləndirilməsi üzrə addımları davam etdirmək cəhdi kimi qiymətləndirilir.

Azərbaycanı qonşu ölkələrlə müqayisə edən hesabat müəllifləri qeyd edirlər ki, Ukrayna, Gürcüstan və Moldova demokratiya istiqamətində irəliləyir, Azərbaycan və bir sıra digər şərq ölkələri isə hakimiyyəti möhkəmləndirməyə çalışaraq, qeyri-sabitliyə hazırlaşır. Məhz bu məqsədlə, öz hakimiyyətinin qorunub saxlanmasını zəmanət altına almaq üçün İlham Əliyev referendum keçirib, deyə hesabatda bildirilir.

Hesabata əsasən, Azərbaycanda vəziyyət Kuba, Çin və İranda olduğundan daha pisdir. Eyni zamanda, Azərbaycanın qonşuları – Ermənistan və Gürcüstan qismən azad ölkələr sırasına aid edilib.

Türkiyə, Rusiya və İran da qeyri-azad ölkələr arasındadır, hələ bu yaxınlarda azad hesab olunmasına baxmayaraq, Türkiyədə vəziyyətin sürətlə pisləşdiyi qeyd olunur.

Rəsmi Bakı artıq daim tənqidə məruz qoyulduğu beynəlxalq təşkilatların hesabatlarına reaksiya vermir. -16D-