Qalmaqallı hakim xəstəxanaya yerləşdirilib

Bakı Ağır Cinayətlər Məhkəməsinin hakimi Ənvər Seyidov ürəyində yaranan problemlərlə bağlı xəstəxanaya yerləşdirilib.

Xəbəri Turan-a məhkəmədən təsdiqləyiblər.

Məhkəmədən deyiblər ki, Ə.Seyidov ötən həftənin sonundan işə çıxmır.

Ə.Seyidovun hazırda durumunun necə olması ilə bağlı bilgi almaq mümkün olmayıb.

Məhkəmə Hüquq Şurasından bununla bağlı suala cavab verməyiblər.

Bakı Ağır Cinayətlər Məhkəməsinin hakimi Ənvər Seyidov bir müddət öncə mərhum prezident Heydər Əliyevin heykəlinə şüar yazdıqdan sonra həbs olunan gənc fəal Qiyas İbrahimlinin məhkəmə işindəı gündəmə gəlmişdi.

Ənvər Seyidov gənc fəala dövlət ittihamçısının istədiyindən də ağır - 10 il azadlıqdan məhrum etmə cəzası vermişdi.

Həmin məhkəmədən bir neçə gün sonra Ə.Seyidov yenidən qalmaqalla xatırlanmışdı.

Hakim qətldə təqsirləndirilən Elməddin Ağayev adlı şəxsə 19 il müddətinə azadlıqdan məhrum etmə cəzası kəsmişdi. Həmin hökmdən sonra məhkəmə iclası qarışmışdı. Təqsirləndirilən şəxsin yaxınları hakimi ədalətsizlikdə ittiham etmişdilər, E.Ağayevin qohumu olan bir qadın isə üzərinə benzin tökərək intihara cəhd etmişdi.—0-