Qarabağ müharibəsi veteranı ölümlə hədələnir

Müharibə veteranı, Müdafiə Nazirliyinin xüsusi təyinatlı kəşfiyyat rotasının keçmiş komandiri Tofiq Cəfərov 1993-cü ilin iyununda erməni terrorçu Monte Melkonyanın məhv edilməsi ilə bağlı həqiqətlərin ictimaiyyətə açıqlanmasına görə ölümlə hədələnir. Bu barədə o, bu gün Reportyorların Azadlıq və Təhlükəsizlik İnstitutunun Media Mərkəzində keçirilən mətbuat konfransında bildirib.

T.Cəfərovun ünvanına hədələr İbad Hüseynovun ətrafındakı adamlardan gəlir. Belə ki, sonuncu bildirir ki, xüsusi əməliyyatlar zamanı əlbəyaxa döyüşündə Melkonyanın başını kəsib.

T.Cəfərov bunu inkar edənlərdən biridir və Melkonyanın Mərzili kəndində PDM-dən açılan atəşlə öldürüldüyünə sübutlar gətirir.

T.Cəfərov bildirib ki, onun rəhbərliyi ilə xüsusi təyinatlı kəşfiyyat rotası (XTKR) Baş Qərargah rəisinin 31 iyul 1992-ci il tarixli əmrinə əsasən  yaradılıb. XTKR-nin vəzifəsi 577-ci yüksəklikdən Xocavənd şəhərində (keçmiş Martuni) və onun ətrafında baş verənləri, orada hərbi  qüvvələrin dislokasiyasını və düşmənin nəqliyyatının hərəkətini müşahidə etmək olub. Eyni zamanda rotaya tapşırılıb ki, təxribatların qarşısının alınması məqsədilə qonşuluqda yerləşən Azərbaycan ordusunun 708 və 702-ci briqadalarında baş verənləri müşahidə etsin. İbad Hüseynovun xidmət keçdiyi 161 saylı hərbi birləşmə XTKR-nin 7 km. arxasında yerləşib.  “Odur ki, düşmənin arxasında heç bir xüsusi əməliyyat bizim göstərişimiz olmadan keçirilə bilməzdi. Əgər hər hansı əməliyyat planlaşdırılsaydı bizim bundan xəbərimiz olmalı idi”, - T.Cəfərov vurğulayıb. Onun sözlərinə görə, rota “Avo” ləqəbli tanınmış erməni terrorçunun cəbhənin həmin sahəsində olması barədə məlumata malik idi. Lakin onun məhvilə bağlı əmr daxil olmamışdı. 

T.Cəfərovun sözlərinə görə, Melkonyan Ağdam rayonunun Mərzili kəndinin düşməndən alınması ilə bağlı hərbi əməliyyat zamanı öldürülüb. Bunu 708-ci briqadanın komandir müavini Umudvar Mirzəyev də təsdiqləyib.

Onun sözlərinə görə, Melkonyan bir neçə hərbçi ilə birlikdə UAZ avtomobilində gedirmiş və həmin avtomobil Azərbaycana məxsus PDM tərəfindən vurulub. Melkonyan maşından sıçrayaraq daş hasarın arxasında gizlənməyə cəhd göstərib. Lakin PDM-dən açılan mərminin bir neçə qəlpəsi onun başını ölümcül yaralayıb.

Melkonyanın maşınını vuran PDM ekipajı üç nəfərdən ibarət olub. Onlardan ikisi – Şaiq Kəlbiyev (Biləsuvar) və Asəf Mütəllimov (Neftçala) qəhrəmancasına həlak olublar. Üçüncü, o zaman 19 yaşı olan Azaddin Musayev sağdır və hazırda xidməti davam etdirir.

“Lakin o zaman biz hələ bilmirdik ki, Melkonyan öldürülüb. Melkonyanın və digər ermənilərin cəsədi neytral zonada idi, onları nə biz, nə də ermənilər götürə bilmirdi. Ermənilər onları yalnız səhər götürdülər. Artıq sonradan Melkonyanın Mərzilidə qətlə yetirilməsi barədə radioməlumatlara və erməni tərəfinin rəsmi bilgisinə əsasən məlum oldu ki, bizim briqadanın döyüşçüləri onu məhv ediblər”, - U.Mirzəyev vurğulayıb.  

İ.Hüseynovun fikirlərinə gəlincə, U.Mirzəyevin sözlərinə görə, əo, Melkonyanın onun doğma kəndində Xocavənd rayonunun Muğanlı kəndində öldürülməsindən danışır.

İ.Hüseynovun yaydığı fotolarda nümayiş olunan kəsilmiş baş 1992-ci ildə öldürülmüş erməni yaraqlısına məxsusdur, Melkonyan isə 1993-cü ildə öldürülüb.

T. Cəfərov deyib ki, bu faktların açıqlanmasında əsl məqsəd Qarabağ müharibəsi faktlarının saxtalaşdırılmasına yol verilməməsi, şəhidlərin xatirəsinə ehtiram, qəhrəmanlıqlarını başqalarının mənimsədikləri veteranların xidmətlərinin tanınmasıdır. 

T. Cəfərov bildirib ki, İ. Hüseynovun və müharibənin lap əvvəllərindən hərbi əməliyyatlarda iştirak edən,  Xocavənd rayonunun özünümüdafiə dəstələrinin önündə olan qardaşları Eyvaz, Əbülfəz, İlyasın xidmətlərini kiçiltmir. 

T. Cəfərov qeyd edib ki, o, İ.Hüseynovun ətrafında toplaşan və onun “şücaətini” qəhrəmanlaşdırmağa çalışan “mafioz qrupu”nun bundan qazanc məqsədi üçün istifadə etməsinin əleyhinədir.

Belə ki,  bu adamlar İbad Hüseynov Fondu təsis etmək və bunun vasitəsilə biznes üçün imtiyazlara nail olmaq niyyətindədir.

T.Cəfərovun  özünə təklif olunub ki, İ.Hüseynovun barəsində bəyanatlara son qoysun və bunun müqabilində ona Bakıda vəzifə (U.Cəfərov Ağcabədidə yaşayır)  və maddi mükafat vəd olunub.

O, həmin söhbətin audioyazısından fraqment təqdim edib.

Lakin Cəfərov bu təklifi qəbul etmədikdən sonra onu ölümlə və qohumlarının öldürülməsilə hədələməyə başlayıblar. Həm də mobil telefondan açıq nömrədən  zəng ediblər.

T.Cəfərov konkret adlar açıqlayıb: Tahir İmamverdiyev, Akif Qasımov ( fəaliyyətdə olan zabit) və Məhəmməd Qədirov (keçmiş hərbçi). Bu adamlar sözügedən sahədə xidmət keçiblər, lakin sonrakı illərdə.

T.Cəfərov Ağcabədi polisinə müraciət edib və rayon prokurorunun müavini ilə görüşüb. Sonuncu ona bildirib ki, “hədələr araşdırılmır”. 

T.Cəfərov həmçinin DİN-ə müraciət edib, lakin hələlik cavab ala bilməyib.

Öz növbəsində U.Mirzəyev bildirib ki, Ağdam-Füzuli istiqamətində xidmət keçən bir qrup keçmiş döyüşçü prezidentə müraciət edərək veteranlar arasında mübahisəyə son qoymaq üçün sözügedən hadisələrin araşdırılması üzrə komissiya yaradılmasını xahiş edib. 

Hərbi ekspert və hüquq müdafiəçisi Ələkpər Məmmədov müharibə faktlarının saxtalaşdırılması, başqalarının xidmətlərini mənimsəməklə kimisə qəhrəmanlaşdırmaq cəhdlərini pisləyib. 

Bundan əlavə, Ə.Məmmədov qeyd edib ki, kəsilmiş baş əks olunmuş fotokadrların nümayişi düşmənin xeyrinədir, çünki azərbaycanlıların “qaniçən müsəlman, başkəsən” kimi təqdim olunmasında istifadə edilə bilər. Halbuki, əslində ermənilər azərbaycanlılara qarşı barbarlıq, kütləvi qətllər, Xocalıda soyqırım törədiblər.

Ə.Məmmədov dövlət orqanlarını bu cür yalançı qəhrəmanlğın qarşısını almağa çağırıb.06C--