Qarabağ müharibəsinin əlili polis özbaşınalığından şikayət edib

Bakı/21.07.17/Turan: Qarabağ müharibəsinin əlili Məğrub Bədəlsoy ona qarşı polis təzyiqi olduğunu bildirib.

"Polisin təzyiqinə məruz qalmışam. İyulun 20-də axşam Nizami rayon polis idarəsinin 24-cü polis bölməsinin əməkdaşları evimə gəliblər və məni zorla bölməyə aparıblar", deyə Bədəlsoy Turan-ın müxbirinə bildirib.

Veteranın sözlərinə görə, ona ayaqqabısını geyinməyə belə imkan verməyiblər.

Bölmədən onu Nizami rayon polis idarəsinin rəis müavininin yanına aparıblar.

Polis zabiti ona bildirib ki, Bədəlsoy tez-tez etiraz aksiyaları keçirməklə "dövlətin əleyhinə çıxır".

O, öz növbəsində deyib ki, dövlət əleyhinə heç bir hərəkət etmir, yalnız konstitusiyada nəzərdə tutulan hüquqlarına riayət olunmasını tələb edir.

Polis rəisinin müavini Bədəlsoyu təhqir edib. Bundan sonra onu sərbəst buraxıblar və xəbərdarlıq veriblər.

Bədəlsoy deyib ki, polisin ona qarşı kobud rəftarına cavab olaraq iyulun 21-də Prezident Administrasiyası qarşısında tənha piket keçirib və "Vətəndaşlıqdan və hökumətdən imtina edirəm" şüarı yazılan plakat qalıdırıb.

Aksiya 10 dəqiqəyə yaxın davam edib.

Bədəlsoy qeyd edib ki, iyulun 21-də bir qrup Qarabağ müharibəsi əlili, şəhid jurnalistlərin ailələri jurnalistlər üçün tikilmiş evdə onlara mənzil verilməməsinə etiraz əlaməti olaraq KİV-ə Dəstək Fondunun binası qarşısında etiraz aksiyası keçirməyə hazırlaşırdılar.

Amma aksiya polisin amansız addımlar atması ehtimalı ilə əlaqədar ləğv edilib, deyə Bədəlsoy qeyd edib. -06B-