"Qarabağ tribunası" yaradılı

Bakı/02.12.12./Turan: Bir qrup ekspert "Qarabağ tribunası" ictimai-siyasi vətəndaş təşəbbüsünü təsis edib. Buraya təhlükəsizlik sahəsində ekspert İlham İsmayıl, "Bakı Dirçəliş" Birliyinin sədri Abbasağa Məmmədov və siyasi icmalçılar Xaqani Cəfərli və Nəsimi Məmmədli daxil olub.

Onlar birgə bəyanatlarında qeyd edirlər ki, Dağlıq Qarabağ ətrafında davam edən hərbi-siyasi proseslər yeni və ölkəmiz üçün təhlükəli mərhələyə qədəm qoyub. Hazırda Ermənistan beynəlxalq ictimai rəydə öz hərbi qələbələrini siyasi-diplomatik gedişləri ilə möhkəmləndirmək istiqamətində uğurlu mövqeyə çıxıb. Demokratik cəmiyyət quruculuğu istiqamətində beynəlxalq təqdir qazanıb. Rusiyanı və Qərbi öz milli maraqları ilə hesablaşmağa sövq edib.

"Bu şəraitdən də istifadə edərək ərazilərimizdə məskunlaşma həyata keçirir, "xalqların sülhə hazırlanması" prosesindən yararlanır. Azərbaycan isə nüfuzlu beynəlxalq hesabatlarda "Qeyri-azad" ölkə kimi xarakterizə olunmaqda davam edir", deyə bəyanatda bildirilir.

Azərbaycanda sosial-iqtisadi vəziyyət getdikcə pisləşir və dövlət-vətəndaş münasibətlərində gərginlik artır. Cəmiyyətdə vətəndaş iştirakçılığının çərçivəsi tamamilə daraldılıb. Xüsusi ilə də Qarabağla bağlı müstəqil və müxalif təşəbbüslərin cəmiyyətdə sərbəst ifadə olunmasına ciddi əngəllər yaradılır.

Eyni zamanda, rəsmi Bakı Ermənistanın hücum diplomatiyasına, işğalçılıq siyasətinə, Rusiya rəsmilərinin əzici bəyanatlarına adekvat reaksiya verə bilmir.

"Qarabağ tribunası" siyasi partiyaların, ictimai təşkilatların və ictimai xadimlərin fikirləri əsasında Azərbaycanın ümumi strategiyasını işləyib hazırlamaq niyyətindədir.

"Qarabağ tribunası"nın üzvləri münaqişənin müstəsna olaraq Azərbaycanın ərazi bütövlüyü çərçivəsində həll edilə biləcəyini hesab edirlər. Ekspertlər Qarabağ məsələsində eyni mövqeyə malik olan hər kəslə əməkdaşlıq etməyə hazırdırlar, deyə bəyanatda bildirilir. -06D-