RF XİN Lavrovun səfəri və Qarabağ nizamlanması haqqında

Moskva/02.12.19/Turan: 2-3 dekabr tarixlərində Rusiyanın xarici işlər naziri Sergey Lavrov Azərbaycana rəsmi səfərə gələcək. Bakıda danışıqlar zamanı ikitərəfli əməkdaşlığın mühüm məsələlərinin müzakirə edilməsi planlaşdırılır. Beynəlxaq və regional problemlərlə, o cümlədən Dağlıq Qarabağ nizamlanması ilə bağlı ətraflı fikir mübadiləsi aparılacaq. Rusiya və Azərbaycan xarici siyasət idarələrinin 2020-ci il üçün Məsləhətləşmələr Planının imzalanması planlaşdırılır, bu barədə RF XİN-in şərhində deyilir.

"Rusiya Dağlıq Qarabağ münaqişəsinin nizamlanması üzrə vasitəçilik səylərində fəal rol oynamağa davam edir. DQ nizamlanması tərəflərinə yardım Rusiyanın xarici siyasət prioritetləri arasındadır, Rusiya prezidentinin diqqət mərkəzindədir. Münaqişənin müstəsna olaraq siyasi-diplomatik vasitələrlə, tərəflər arasında dialoq yolu ilə həll edilə biləcəyinə əsaslanırıq. Bundan sonra da həm DQN üzrə ATƏT-in Minsk Qrupunun həmsədrləri tərkibində, həm də Azərbaycan və Ermənistanla sıx münasibətlərimizi nəzərə alaraq, milli olaraq nizamlanma əldə olunmasına kömək edəcəyik", deyə şərhdə qeyd edilir. -02D-