Qəbələdə sel suları təsərrüfatın ayrı-ayrı sahələrinə ziyan vurub

Qəbələ rayonuna yağan güclü leysan yağışları nəticəsində yaranan sel suları küçələri, əkin sahələrini, evləri, həyətyanı sahələri basıb.

    Rayon icra hakimiyyətindən Turana bildiriblər ki, iyulun 10-11-də Qəbələ şəhərinə və rayonun dağlıq ərazidə yerləşən Bunut, Nohurqışlaq, Laza, Duruca, Zarağan, Vəndam kəndlərinə güclü leysan yağıb. Yağışın əmələ gətirdiyi sel suları kənd yollarına ziyan vurub, Qəbələ şəhərinin 10-a yaxın küçəsində suyun hündürlüyü 30 santimetr olub, selin yaratdığı sular həyətyanı sahələrə, fərdi yaşayış evlərinin zirzəmilərinə dolub.

    Rayon ərazisindən keçən Tikanlı-Qaraçay, Həmzəliçay, Türyançay, Dəmiraparançay, Bumçay, Mirzəbəyliçay, Vəndamçay çaylarında suyun səviyyəsi iki metrədək qalxıb, sel bəzi ərazilərdə çaysahili mühafizə bəndlərini dağıdıb. Dağlardan gələn sel suları Bunud kəndindən keçən Bunudçayın və Daşlıca kəndindən keçən Pirəlliçayın üzərindəki 3 avtomobil körpüsünü, eləcə də Zarağan kəndində və Qəbələ şəhərindən keçən Qaraçay çayının üzərindəki 3 su keçidini dağıdıb. 

    Hazırda rayon fövqəladə hallar komissiyasının nümayəndələri yerlərdə vətəndaşların müraciətlərinə baxır, təsərrüfatın ayrı-ayrı sahələrinə dəymiş ziyanın nəticələrinin aradan qaldırılması üçün tədbirlər görülür.  -0-