Qəhrəman ailəsinin faciəli dastanı davam edir

Bakı/16.01.20/Turan: “Turan” İnformasiya Agentliyi 1994-cü ilin aprelində Azərbaycanın ərazi bütövlüyü uğrunda döyüşlərdə qəhrəmancasına həlak olmuş hərbi qulluqçu İmamverdi Zabidovun ailəsinin faciəli dastanına həsr olunmuş silsilə materiallar dərc etmişdir.

Agentlik Zabidovlar ailəsinin probleminə diqqət cəlb etmək üçün bir sıra dövlət orqanlarına informasiya sorğuları göndərmiş, həmçinin onların “Məlumat Azadlığı haqqında Qanun”a riayət etmədikləri ilə əlaqədar müvafiq  məhkəmə iddiaları qaldırmışdır.

Bu faciəli əhvalatın qısa məzmunu belədir. 1993-cü ildə Evtikmə Kombinatı İmamverdi Zabidova mənzil verir. O, Qarabağa  müharibəyə gedir, bu zaman isə Qubatlı qaçqınları Zabidovun mənzilinin də yerləşdiyi 15-mənzilli  binanı tam tuturlar. İ.Zabidovun həyat yoldaşı Nailə Zabidova iki azyaşlı uşağı ilə sözün əsl mənasında  küçədə qalır. Qohumları onlara sığınacaq verəsi olur. Rəislərin kabinetlərinə  sonsuz  ayaq döymə,  məhkəmələrə müraciət heç bir nəticə vermir. 2019-cu ilin aprel ayında qaçqınları yeni tikilmiş binaya köçürdürlər. Qəza vəziyyətində olan yaşayış üçün yararsız köhnə binanı isə əvvəlki sakinlərinə qaytarırlar.

"Haqq üçün demək lazımdır ki, Sumqayıt Şəhər İcra Hakimiyyətinin başçısı Zakir Fərəcov öz təşəbbüsü ilə məni qəbul etdi və mənzilimin təmir edilməsi barədə göstəriş  verdi",- deyə  qəhrəmanın həyat yoldaşı Nailə Zabidova xatırlayır.

Lakin o, vurğulayır ki, təmir zahiri xarakter daşıyır –  təmirçilər köhnəlmiş döşəmə taxtalarından  istifadə edirlər, qapılar yoxdur, çürük pəncərə çərçivələri dəyişdirilmir, sanitariya qovşağı çirkin, yararsız vəziyyətdə qalıb. Biz onunla birlikdə binaya və mənzilə  baxış keçirdik, onların vəziyyəti N.Zabidovanın dediklərinin düz olduğunu təsdiq etdi.

Mənzillərin özbaşına ələ keçirilməsindən zərər  çəkmiş  digər bir xanım bildirdi ki, binada  gözə çarpan çatlar olduğundan  bəzi mənzil sahibləri evə köçməkdən çəkinirlər.

Birmənalı olaraq aydındır ki, bina əsaslı  təmir edilməli və bəlkə də artıq sökülməlidir. Lakin bu məsələni müvafiq şəhər strukturları qanuna uyğun surətdə  həll  etməlidir.

Hələlik isə  Zabidovlar ailəsinin faciəli dastanının davam etdiyini təəssüf hissi ilə  təsdiq etmək olar. - 0-

http://www.turan.az/ext/news/2018/9/free/Social/az/75167.htm

http://www.turan.az/ext/news/2018/10/free/Social/az/75771.htm

http://www.turan.az/ext/news/2019/4/free/Social/az/80467.htm