QHT koalisiyası itkin düşmüşlərin ailələrinə xüsusi sosial ödəmələr tələb edir

“SeDEP” QHT koalisiyası cümə günü “İtkin düşmüş şəxslərin ailə üzvlərinə dövlət qayğısı: Problemlər və perspektivlər” mövzusunda dəyirmi masa keçirib.

Müzakirələr zamanı qeyd edilib ki, problemlərdən biri itkin düşmüş şəxslərin sosial sığortalarının ödənilməməsidir.

1992-ci il tarixli hərbi qulluqçuların statusu haqqında qanuna əsasən, onlar hərbiçi statusu alan kimi sığortalanırlar. Lakin Maliyyə Nazirliyi 1997-ci il tarixli qanuna istinad edərək, itkin düşmüşlərin varislərinə sığortaları ödəməkdən imtina edirlər.

İtkin düşmüşlərin 99%-i hərbi qulluqçulardır və icbari sığortaları var.

Hərbiçi hüquqşünas Telman Əbilov Maliyyə Nazirliyinin mövqeyini əsassız sayır.

Bundan başqa, Maliyyə Nazirliyi hətta məhkəmə qərarları olduqda belə sığorta ödəmələrini verməkdən imtina edir.

Əbilov Maliyyə Nazirliyinin vəsaitlərin yetmədiyi barədə arqumentlərinin əsassız olduğunu bildirir.

Onun sözlərinə görə, Müdafiə Nazirliyi hər il dövlət kommersiya sığorta şirkətinə 10 mln. manat ödəyir. “SeDEP” QHT koalisiyası problemin həlli üçün 1991-94-cü illərdə Qarabağ münaqişəsi zonasında döyüş əməliyyatları zamanı itkin düşmüş hərbi qulluqçuların və mülki şəxslərin və onların ailə üzvlərinin statusu haqqında xüsusi qanun qəbul etməyi təklif edir. 

Xatırladaq ki, münaqişə zonasında itkin düşmüşlərin sayı 4 min nəfərdən çoxdur. -16D-