Qiyas İbrahimovun vəkili Baş Prokurorluğa müraciət edib

Bakı/10.07.17/Turan: Vəkil Elçin Sadıqov müvəkkili, 2 saylı Cəzaçəkmə Müəssisəsində cəza çəkən gənc fəal Qiyas İbrahimova işgəncə iddialarının araşdırılması üçün bu gün, iyulun 10-da baş prokuror Zakir Qaralova müraciət edib.

Bu haqda Azadlıq Radiosuna vəkilin özü məlumat verib.

Onun sözlərinə görə, baş prokurordan gənc fəalın işgəncəyə məruz qalması ilə əlaqədar araşdırma aparılmasını təmin etməsi, işgəncə iddiasında adları hallanan şəxslər barəsində cinayət işi başladılması xahiş edilir.

"Baş Prokurorluq qarşısında həmçinin 2 Saylı Cəzaçəkmə Müəssisəsinin işgəncə hallarının baş verdiyi günlərə aid videokamera görüntülərinin alınması barəsində vəsatət də qaldırmışıq. Çünki həmin lent yazılarında Qiyas İbrahimova işgəncə verilməsi faktları öz təsdiqini tapır", deyə vəkil bildirib.

Elçin Sadıqov həmçinin işgəncə iddialarının araşdırılması üçün ombudsman Elmira Süleymanovaya da müraciət ünvanladıqlarını bildirib.

Ötən həftə Qiyas İbrahimovun cəzaçəkmə müəssisəsində işgəncəyə məruz qalması barədə anası açıqlama vermişdi. Ancaq Ədliyyə Nazirliyinin Penitensiar Xidməti deyilənləri təkzib etmişdi.

Ardınca Qiyas İbrahimovla həbsxanada görüşən vəkili onun həyatının təhlükədə olduğunu bildirmişdi.

Vəkil məhbusun işgəncəyə məruz qalması haqda ona təqdim etdiyi məktubu da ictimaiyyətə açıqlamışdı.

Məktubda deyilənə görə, Qiyas İbrahimov 2 saylı Cəzaçəkmə Müəssisəsinə gəldiyi gün "yoxlanışa mane olmasına" və suallara "qeyri-səmimi" cavab verməsinə görə 15 sutkalığa cərimə kamerasına salınıb. Daha sonra o, müəssisənin əməliyyat rəisinin təhqirinə cavab verdiyi üçün rəis müavini Şakir Qəniyev tərəfindən döyüldüyünü bildirirdi.

Bu gün, iyulun 10-da Ombudsman Aparatının əməkdaşı Rəşid Rumzadə Qiyas İbrahimovun məsələsilə maraqlandıqlarını bildirib. -0-