Qubad İbadoğlunun həbsindən 1 il ötür

1 il əvvəl, 23 iyul 2023-cü ildə London İqtisad Məktəbinin əməkdaşı, professor Qubad İbadoğlu xanımı ilə birgə  Sumqayıt şəhərindən Novxanı qəsəbəsində yaşadığı ünvana qayıdarkən onun maşını 5-6 avtomobillə dövrəyə alınaraq, 20-dək mülki geyimli şəxslər tərəfindən  biabırcasına saxlanılıb. Saxlanma zamanı o və xanımı İradə Bayramova fiziki zorakılıqla üzləşib. Onlar oğurlanaraq DİN-in Mütəşəkkil Cinayətkarlıqla Mübarizə Baş İdarəsinə gətiriləndən 7 saat sonra İradə Bayramova, 274 gün sonra Qubad  İbadoğlu azad olunub. Çoxsaylı yerli və beynəlxalq çağırışlardan sonra İbadoğlu haqqında həbs qəti imkan tədbiri 22 aprel 2024-cü ildə ev məhbusluğu ilə  əvəz olunub. Mayın 20-dək onun ayağına dustaqlar üçün nəzərdə tutulan qolbağ geydirilib. Mayın 21-də isə ev dustaqlığı müstəntiqin qərarı ilə polisin nəzarətinə verilmə ilə əvəz olunub və iş üzrə istintaqın müddəti daha 3 ay (avqustun 20-dək) uzadılıb.

14 sentyabr 2023 və 24 aprel 2024-cü il tarixlərində  Avropa Parlamenti onun təcili və qeyd şərtsiz azad olunmasına  çağırış edən Qətnamələr qəbul edib. ABŞ Dövlət Departamenti onun azad olunmasına dair dəfələrlə bəyanatlar verib.  ABŞ Nümayəndələr Palatası və Senatının, Britaniya və Avropa Parlamentlərinin, Avropa Şurası Parlament Assebleyasının üzvləri  Qubad İbadoğlunun həbsindən narahatlığını ifadə ediblər, Azərbaycan hakimiyyətini  onu qeydsiz, şərtsiz azad etməyə çağırıblar.  ABŞ,  Böyük Britanıyanın və Almaniyanın nüfuzlu Universitetinin 100-dən çox professoru təmsil etdikləri ölkələrin rəhbərlərinə Qubad İbadoğlunun azadlığı üçün müraciət ediblər. Professorun  doğum günündə,  12 sentyabr 2023-cü ildə 52 yaşının tamam olması münasibətilə dünyanın 52 ölkəsində vətəndaş cəmiyyəti fəalları aksiyalar keçirdi. Dünyanın 88 ölkəsini təmsil edən 240 qeyri-hökümət təşkilatının və akademik dairələrin nümayəndələri Qubad İbadoğluya azadlıq cağırışı  ilə açıq məktub ünvanlayıb. COP29 ilə əlaqədar 03-13 iyul tarixlərində Bonnda keçirilən iqlim sammitində Qubad İbadoğlunun foto porjeksiyaları ilə şəhərin binalar işıqlandırılıb.  Qlobal səviyyədə fəaliyyət göstərən əksər hüquq müdafiə və anti-korrupsiya üzrə beynəlxalq təşkilatlar Dr. Qubad İbadoğlunun azdlığı üçün bəyanatlar qəbul edib və Azərbaycan hakimiyyətinə məktublar ünvanlayıb. 

 Hazırda Qubad İbadoğlunun  səhhətində ciddi problemlər olmasına baxmayaraq ona ölkədən çıxış qadağası qoyulub,  bu səbədən o xaricdə  zəruri  tibbi qayğı ilə təmin oluna bilmir.

Qubad İbadoğlu  24 iyul 2023-cü ildə Cinayət Məcəlləsinin 204.3.1-ci (saxta pul və ya qiymətli kağızlar hazırlama, əldə etmə və ya satma) və 25 avqust 2023-cü ildə  Cinayət Məcəlləsinin 167-3.1-ci (dini ekstremist materialları hazırlama, saxlama və ya yayma) maddələri ilə ittiham edilir. Bu ittihamlar üzrə onu maksimum 17 ilədək cəza gözləyir.

Qubad İbadoğlu 1  ildir ki, ailəsindən və işindən təcrid olunub. Qubad İbadoğlu ona qarşı ittihamların əsassız və siyasi olduğunu, fəaliyyətinə görə cəzalandırıldığını qeyd edir.