Qulu Məhərrəmli: «Təhqir yox, tənqid etmişəm»

Dünən Yasamal Rayon Məhkəməsində AzTV-nin sədri Arif Alışanovun jurnalist Qulu Məhərrəmliyə qarşı xüsusi ittiham qaydasında verdiyi şikayət üzrə növbəti məhkəmə prosesi keçirilib.

  Turan-ın məlumatına görə, hakim Azər Tağıyevin sədrliyi ilə keçirilən prosesdə A.Alışanovun vəkili Zaur Abbasov vəsatətlə çıxış edib və narazılığa səbəb olmuş müsahibə ilə bağlı mütəxəssis rəyinin mütləq olmasını deyib. O bildirib ki, Q.Məhərrəmlinin verdiyi müsahibə ilə bağlı linqvistik eskpertiza təyin edilsin və Alışanovun ünvanına dediyi sözlərin tənqid və yaxud təhqir olması müəyyənləşsin.

Qulu Məhərəmlinin vəkili Cavid Rzazadə məhkəmənin indiki mərhələsində məhkəmə araşdırması olmadan, vəsatətin belə tələm-tələsik baxılmasına qarşı çıxıb: "Biz vəsatətin təmin olunmasınn əleyhinə deyilik, amma vəsatətə baxmaq üçün vaxt lazımdır. Bizim də suallarımız var. Bunun baxış iclasında müzakirə edilməsi daha məqsədə uyğun olardı". 

Qulu Məhərrəmli isə vəsatətdəki təhrikçi, indidən ekspertizaya yön verən ifadələrə etiraz edib. Professor bildirib ki, o, Arif Alışanovu təhqir yox, tənqid edib: “Bir adama deyirsən, səviyyən bəsitdi və yaxud düşüncən feodaldır. Burada təhqir yox, tənqid var. Ona görə də bu sözlərlə bağlı xüsusi linqvistik rəyə ehtiyac yoxdur, amma biz ekspertizaya qarşı da deyilik, sadəcə, bu cür tələsikliyi anlamırıq. Vəsatətdə çoxlu yanlışlıqlar var, məsələn, burada yazılıb ki, guya mən həmin müsahibənin mətbuatda dərc olunması üçün çalışmışam. Xeyr, mən media ekspertiyəm, gündə onlarca jurnalistin sualı ilə bağlı açıqlama verirəm. Həmin müsahibədə 10 sual olub. Sualların yalnız ikisi Alışanova aiddir. Suallara uyğun olaraq mən müsahibədə AzTV tarixində parlaq iz qoymuş sədrlər haqqında da danışmışam və o şəxsiyyətlərlə müqayisədə A.Alışanovun necə fiqur olduğunu demişəm". 

Hakim qərar qəbul etmək üçün müşavirəyə gedib. Uzun çəkən məşvərətdən sonra A.Alışanov tərəfinin vəsatəti təmin edilib. Həmin məqalə ekspertizaya göndərilib və proses qeyri-müəyyən vaxta qədər təxirə salınıb.

Qeyd edək ki, Q.Məhərrəmlinin Azərbaycanda televiziyanın kütləvi yayıma başlamasının 60 illiyi ilə bağlı verdiyi müsahibədən sonra A.Alışanov şərəf və ləyaqətinin təhqir olunduğunu iddia edərək Yasamal Rayon Məhkəməsinə müraciət edib. Müraciətdə Q.Məhərrəmliyə qarşı cinayət işinin açılması istənilib. A.Alışanov,  eləcə də Nəsimi Rayon Məhkəməsinə müraciət edərək Q.Məhərrəmlinin 100 min manat cərimə ödəməsini tələb edib.-05D-