Qurban Məmmədov: 14 saylı cəzaçəkmə müəssisəsində məhbusun qətli faktdır

Keçmiş siyasi məhbus, hüquqşünas Qurban Məmmədov “Amerikanın Səsi”nə müsahibəsində vaxtilə cəza çəkdiyi və Yeni İl öncəsi məhbus Elşad Babayevin qətlə yetirildiyi 14 saylı cəzaçəkmə müəssisəsi haqqında təəssüratlarını bölüşüb.

Dekabrın 22-də səhər Elşad qətlə yetirildikdən sonra məhbuslar arasında bu barədə məlumat yayıldı. Onlar qəzəbləndilər və 100-150 nəfər cəzaçəkmə müəssisənin növbətçi hissəsinə hücum etdi, bütün şüşələri qırdı və bir neçə nəzarətçini, o cümlədən zabitləri döydü, deyə Məmmədov bildirib.

Əlbəttə ki, bu, cinayətdir, amma məhbusların əməllərinin səbəbi var idi və bunda onların təqsiri yoxdur, çünki onlar dərk edirdilər ki, Elşadın taleyi onların hər birini gözləyir, deyə hüquqşünas qeyd edib.

Qurban Məmmədov Elşad Babayevin həlak olduğu hadisənin detalları haqqında danışıb.

Münaqişə cəzaçəkmə müəssisəsi ərazisindəki çayxanada Babayev və digər məhbus arasında baş verib, o, növbətçi hissəyə şikayət edib. Babayevi çağırıb izahat tələb ediblər, amma o, nəzarətçilərə kobud cavab verib. Buna görə onu döyməyə başlayıblar və döyərək öldürüblər.

İndi Penitensiar Xidmət Elşadın xəstəlikdən ölə biləcəyini sübut etməyə çalışır və digər məhbuslardan belə ifadələr alır.

“Dekabrın 22-də onlar böyük qanunsuzluqlar baş verib, növbəti günlərdə də bu qanunsuzluqlar davam edib. Mən dekabrın 26-da səhər şəxsən mən barakımızın hücumə məruz qaldığının şahidi olmuşam Mən oradan ilk olaraq çıxdım və iki digər barakın məhbuslarını çıxarıb, yerə uzadıb dəyənəklə döyürlər və söyüb-təhqir edirlər”, deyə Məmmədov bildirib.

Dövlət orqanları baş verənləri ciddi şəkildə araşdırmalıdır. Hədsiz güc tətbiqi göz önündədir, deyə hüquqşünas əlavə edib ki, indiyədək cəzaçəkmə müəssisəsində çox sayda ağır yaralı var və onların böyük əksəriyyəti dindarlardır.

14 saylı cəzaçəkmə müəssisəsindəki şəraitə gəlincə, bu müəssisə hələ 1953-cü ildə və ilk növbədə siyasi məhbuslar, təhlükəli cinayətkarlar üçün tikilib. Buna görə orada şərait ağırdır və cəzaçəkmə müəssisəsində islahatlara ehtiyac var, deyə Qurban Məmmədov bildirib.

Xatırladaq ki, Penitensiar Xidmət məhbus Elşad Babayevin işgəncələr nəticəsində öldüyünü etiraf etmir, prokurorluğun araşdırması başa çatdıqdan sonra açıqlama verməyi vəd edir. -16D-