«Rabitə işi» üzrə məhkəmə prosesi şahid ifadələri ilə davam edir

Bu gün Bakı Ağır Cinayətlər Məhkəməsində Rabitə və Yüksək Texnologiyalar Nazirliyinin sabiq aparat rəhbəri Vidadi Zeynalov və digərlərinin cinayət işi üzrə məhkəmə prosesi davam etdirilib.

Turan-ın müxbirinin verdiyi  məlumata görə, bugünki prosesdə hakim sabiq aparat rəhbəri V. Zeynalova ifadə verməyi təklif edib.

Lakin təqsirləndirilən V.Zeynalov hazırkı mərhələdə ifadə verməkdən imtina edib.

O, bunu ittihamla tam tanış olmaması ilə əsaslandırıb.

Rabitə Nazirliyinin nümayəndəsi Vüqar   Babayev 153 milyon 346 min manatlıq mülki iddianı müdafiə etdiyini və məbləği müştərək qaydada təqsirləndirilən şəxslərin ödəməsini istəyib.

Daha sonra prosesdə şahidlər ifadə veriblər.

İlk olaraq şahid qismində sabiq MTN generalı Sübahir Qurbanovun sürücüsü Ramil Əliyev dindirilib.

O, öz ifadəsində bildirib ki, təqsirləndirilən şəxslərdən yalnız Vidadi Zeynalovu tandıyır. Şahidin sözlərinə görə,  hazırda həbsdə olan sabiq MTN generalı Sübahir Qurbanovun sürücüsü olub və təqsirləndirilən şəxslərdən yalnız V. Zeynalovu tanıyır.

Onun sözlərinə görə, hər ay V. Zeynalovun yanına gələrək, ondan bağlama paket alıb və S. Qurbanova çatdırıb.  V. Zeynalov da R. Əliyevə pul verdiyini təsdiqləyib.

Şahid qismində ifadə verən Rəqifə Abbasova bildirib ki, nazirliyin Maliyyə Sabitliyi Şurasında şöbə müdiri vəzifəsində çalışıb, əvvəllər hər ay paketdə 900 manat, sonralarsa 1100 manat alıb.

 Digər şahid Mətanət Məmmədova istintaqa verdiyi ifadəni təsdiq edib. O, uzun müddət nazirliyin plan- maliyyə şöbəsinin müdiri vəzifəsində çalışdığını deyib. Onun sözlərinə görə, 2011- ci illərdə 2300, sonralarsa hər ay paketdə 6 min manat alıb: “Nazirliyin fəaliyyəti ilə əlaqədar arayışların, beynəlxalq hesabatların təhlil edilməsi işlərinə baxırdım. 2013-cü illərin ortalarından ayda paketdə 6000 manat alırdım. Amma devalivasiyadan sonra bu rəqəm 4700 manata düşdü. Paketi Vidadi Zeynalov mənə verirdi”.

Şahid qismində dindirilən Abbas Əhmədov qeyd edib ki, nazirlikdə Bakı-Telefon İstehsalat Birliyində texniki şöbənin müdiri vəzifəsində çalışıb. O deyib ki, vəzifə təlimatına uyğun olaraq paket almayıb.

 Məhkəmə prosesi dekabrın 16-da davam edəcək.-36d-