Ramil Usubov kinorejissorun həbs olunmasını təklif edir

Bazar ertəsi Nəsimi Rayon Məhkəməsində DİN rəhbəri Ramil Usubovun Ziyalılar Birliyinin sədri, kinorejissor Eldəniz Quliyevə qarşı iddiası üzrə iclas davam edib.

Xatırladaq ki, avqustun 20-də E.Quliyev özünün Facebook səhifəsində yol polisinin hərəkətlərini tənqid edib. DİN rəhbəri bunu polisə böhtan və təhqir kimi qəbul edib, şərəf və ləyaqətin müdafiəsi üçün iddia qaldıraraq E.Quliyevin cinayət məsuliyyətinə cəlb olunmasını tələb edib.

Bugünkü iclasda R.Usubovun nümayəndəsi E.Quliyevin 1 il azadlıqdan məhrum edilməsini istəyib. Bu barədə Turan-a E.Quliyev özü bildirib. O, nümayəndənin təklifini uydurma və siyasi motivli hesab edir.

E.Quliyevin fikrincə, ona qarşı iddianın hüquqi əsasları yoxdur və buna “qanunilik” donu geydirmək üçün linqvistik ekspertiza keçirilib ki, bunu da Ədliyyə Nazirliyinin müvafiq mərkəsi keçirib.

E.Quliyev Facebook-da statusa görə azadlıqdan məhrumetmə barədə təklifi ifadə azadlğına təcavüz adlandırıb.

E.Quliyev fəal vətəndaş möqeyinə və Demokratik Qüvvələrin Milli Şurasında iştirakına görə təqib olunduğunu düşünür. 

Növbəti məhkəmə iclası oktyabrın 22-nə təyin edilib. İclas zamanı cavabdehin  və onun vəkilinin yekun çıxışları olacaq. –06D--