RATİ-nin yeni saytının təqdimatı

Çərşənbə günü Reportyorların Azadlıq və Təhlükəsizlik İnstitutu (RATİ) özünün yeni irfs.org saytının təqdimatını keçirib.

RATİ-nin direktoru Emin Hüseynov bildirib ki, saytın əvvəlki versiyası 2007-ci ildə Joomla platformasında hazırlanıb və o zaman texniki baxımdan proqressiv olub. 

Azərbaycan və ingilis dillərində məlumatların yerləşdirildiyi yeni sayt  WordPress platformasında hazırlanıb, həm də təhlükəsizlik baxımından QHT-nin fəaliyyəti üçün əlverişlidir.

Sayt İFEX (ifadə azadlığının dəstəklənməsi üzrə beynəlxalq şəbəkə) və İMS-in (International media support) maliyyə dəstəyilə yaradılıb. 

İMS regional proqramlar üzrə direktor Gülnarə Axundova bildirib ki, saytın əsas ideyası mətbuat azadlığını müdafiə üzrə ictimai kampaniyaların keçirilməsi üçün imkanlar yaratmaq və Azərbaycanda ifadə azadlığının vəziyyəti barədə məlumatlar əldə etməkdir. 

Yeni saytda RATİ-nin maliyyə hesabatlılığı haqda bölmə və köhnə saytdakı əvvəlki materiallar olacaq.

2013-cü ildə RATİ özünün iki digər saytını  – obyektiv.tv i http://www.nakhchivan.org.az yeni platformaya keçirəcək. 

Təqdimat zamanı qeyd olunub ki, Bakıda  BMT-nin himayəsilə Qlobal İnternet İdarəçiliyi Forumu keçirildikdən sonra mövcud problemlər həll edilməmiş qalır. İnternet-dissidentlərin həbsi ilə yanaşı hüquqi və texniki xarakterli problemlər də qalır. 

Azərbaycanın Çin, Rusiya, İran və ərəb ölkələri ilə birlikdə Beynəlxalq Rabitə Birliyinin – İTU qərarını dəstəkləməsi təəssüf doğurur. Bu qərar faktiki olaraq dövlətlərə kontentin yayılmasına təsir göstərməyə imkan verir və şəbəkə üzərində dövlət nəzarətini leqallaşdırır. —06C-