Rauf Mirqədirovun apellyasiya şikayəti təmin edilməyib

Bu gün Bakı Apellyasiya Məhkəməsi jurnalist Rauf Mirqədirovun həbs müddətinin 4 ay uzadılmasından verdiyi şikayəti təmin etməyib. Bu barədə Turan-a vəkil Fuad Ağayev bildirib.

Vəkil məhkəmənin qərarını qanunsuz adlandırıb. Mirqədirov özü məhkəmədə çıxış edərkən təqsirsiz olduğunu bildirib və bəraət tələb edib.

Ağayev Mirqədirovun səhhətində problemlər olduğunu qeyd edib.

Vəkil həmçinin bildirib ki, şikayətə baxılarkən istintaqa prosessual rəhbərliyi həyata keçirən prokuror (baş prokurorun birinci müavini Rüstəm Usubov) deyil, müstəntiq İbrahim Ləmbəranski iştirak edib ki, bu da qanun pozuntusudur.

Xatırladaq ki, Mirqədirov 2014-cü il aprelin 19-da Türkiyədən deportasiya edildikdən dərhal sonra Bakıda saxlanılıb. Ona qarşı Ermənistanın xeyrinə casusluq şəklində dövlətə xəyanət ittihamı irəli sürülüb.

Bu ittiham MTN-in “Samvel” adlı şəxsdən aldığı videogörüntülər əsasında qurulub.

İstintaqın iddiasına görə, videoda Mirqədirovun Tbilisidə beynəlxalq seminarın iştirakçıları ilə söhbət etdiyi və hansısa sənədləri imzaladığı görünür.

MTN iddia edir ki, Mirqədirov pul müqabilində ermənilərə Azərbaycanın hərbi obyektləri və SQ haqqında məlumat verib. Müdafiə tərəfi bu iddiaları uydurma və tamamilə əsassız hesab edir. -16/06D-