Rəsmi məlumatlara görə, Azərbaycanda 28 376 narkoman var

Son 14 ildə Azərbaycanın müalicə-profilaktika müəssisələrində uçota alınmış narkomanların sayı iki dəfədən çox artıb. Dövlət Statistika Komitəsinin məlumatına görə, 2000-ci ildə uçotda olan narkomanların sayı 14010 nəfərə, 2013-cü ildə isə 28376 nəfərə çatıb.

Bu zaman 2013-cü ildə ilk dəfə olaraq “narkomaniya” diaqnozu ilə 1509 nəfər uçota alınıb.

2010-cu ildən ilk dəfə uçota götürülən narkomanların sayı azalır. Eyni zamanda, qeydiyyata alınmş alkoqoliklərin və alkoqol psixozu xəstələrinin sayı artıb – 2000-ci ildə 19591 nəfərdən 2013-cü ildə 21584 nəfərə çatıb.

Onlardan 879 nəfəri ilk dəfə ötən il uçota götürülüb.

2000-ci ildən etibarən qeydiyyata alınmış toksikomanların sayı 104 nəfərdən 130 nəfərə qədər artıb.

Qeydiyyata alınmış psixi xəstələrin sayı da artır. Belə ki, 2000-ci ildə müalicə-profilaktika müəssisələrində 97 279 nəfər uçotda idisə, 2013-cü ildə onların sayı 124134 nəfərə çatıb.

2010-cu ildən hər il təxminən 5 min nəfər psixi xəstəliklər diaqnozu ilə uçota götürülür.

Qeyd edək ki, Azərbaycan əhalisinin sayı 9,5 mln. nəfərə çatır. -06D-