Rəsmi statistika aynasında Azərbaycan qadınları

Bakı/07.03.23/Turan: Dövlət Statistika Komitəsi 2023-cü ilin əvvəlinə Azərbaycanda qadınların sayı, fəaliyyətlərilə bağlı məlumat yayıb.

Məlumata görə, göstərilən dövr üçün ölkə əhalisinin ümumi sayının 50,2 faizini qadınlar təşkil edir.

Keçən ildə doğulmuş 122,8 min körpədən 47,1 faizi qız uşaqları olub.

Ölkənin ümumi təhsil müəssisələrində müəllimlərin 81,9 faizi, orta ixtisas təhsil müəssisələrində 81,3 faizi qadınlardır. Ali təhsil müəssiələrində isə bu rəqəm 57,4 faiz təşkil edir. Həkimlərin üç nəfərdən ikisi qadınlardır.

Ümumi təhsil müəssisələrində təhsil alanların 46,6 faizini, orta ixtisas təhsili müəssisələri tələbələrinin 61,9 faizini, ali təhsil müəssisələri tələbələrinin isə 50%-ini qızlar təşkil edir.

Elm sahəsində elmi işçilərin 59,2 faizi qadınlardır. Son 10 ildə qadınlar arasında elmlər doktoru elmi dərəcəsi olanların sayı 2,2 dəfə, fəlsəfə doktoru elmi dərəcəsi olanların sayı isə 2,1 dəfə artıb.

Azərbaycan Milli Elmlər Akademiyasının həqiqi üzvlərindən 7-si, müxbir üzvlərindən isə 9-u qadındır. Dövlət qulluğunda çalışanlar arasında qadınların xüsusi çəkisi 28,0%, fərdi sahibkarlar arasında isə 22,0%-dir.

Milli Məclisdə qadın deputatların sayı 1990-cı ildə 4,3, 2000-ci ildə 10,7% idisə, hazlırda bu rəqəm 18,6%-ə çatıb.

Beləliklə, Azərbaycan qadınları ölkənin həm sosial-iqtisadi, həm də ictimai-siyasi həyatında fəal iştirak edirlər. 0