Rusiyanın ən böyük kriminal avtoriteti Ded Xasan öldürülüb

Çərşənbə günü Moskvada ən nüfuzlu kriminal avtoritetlərdən biri, Ded Xasan ləqəbli Aslan Usoyan snayperlə qətlə yetirilib.

Hüquq-mühafizə orqanlarındakı mənbənin “Rosbalt”a verdiyi məlumata görə, cinayət Povar küçəsində Usoyanın qərargah-mənzilinin – “Starıy faeton” restoranının yaxınlığında törədilib. Ded Xasan mühafizəçilər və müəssisə işçiləri ilə birlikdə küçədə durarkən snayper ona atəş açıb. Sonradan qarşıdakı evin damından atəş açıldığı müəyyən edilib.

Cinayətkar altı güllə atıb, onların bəziləri Usoyanın çənəsinə dəyib. “Faeton” ofisiantlarından biri də ayağından yaralanıb. Usoyan ağır vəziyyətdə xəstəxanaya çatdırılıb, lakin onu xilas etmək mümkün olmayıb.

Bu. Aslan Usoyana ilk sui-qəsd deyildi. 17 sentyabr 2010-cu ildə snayper Ded Xasanı qarnından yaralayıb. Əməliyyatçılar bu sui-qəsdləri Usoyanla digər kriminal avtoritetlər Rövşən Canıyev və Cemo Mikeladze arasında qarşıdurma ilə əlaqələndirir. İlk sui-qəsddən sonra Ded Xasan bildirib ki, sui-qəsdi Azərbaycan qruplaşmasının lideri “Rövşən Lənkəranski” ləqəbli Rövşən Canıyev təşkil edib. -0-