Salyan fəalı hakimiyyətin təzyiqi altındadır

Salyanda fəaliyyət göstərən “Demokratiyaya yardım” QHT-nin rəhbəri Emil Məmmədov rayon İcra Hakimiyyətinin rəhbəri tərəfindən ona qarşı təzyiq olduğunu bildirib.

Məmmədovu İcra Hakimiyyətinin rəhbəri Tahir Kərimovu tənqid etdiyinə görə hədələyirlər. Bununla əlaqədar Məmmədov KİV vasitəsilə Azərbaycan prezidenti İlham Əliyevə və DİN rəhbəri Ramil Usubova təxribatlardan və hesablaşmalardan qorunması xahişi ilə müraciət edir.

O, Turan-a müraciətində Kərimovun büdcə vəsaitlərindən şəxsi məqsədlərlə istifadə etdiyini iddia edir.

Xüsusən, Kərimov Heydər Əliyev Mərkəzinin tikintisi üçün ayrılmış vəsaitlə qonşu ərazidə 3 mərtəbəli bina tikib. Binanın yerləşdiyi torpaq sahəsi Kərimovun sürücüsünün adına özəlləşdirilib.

T.Xəlilbəyli küçəsinin bir hissəsi yeni evin ərazisinə ayrılıb, bunun nəticəsində piyadaların və maşınların yolu kəsilib. Evin elektrik şəbəkəsi rayon administrasiyasına qoşulub və rayon icra başçısı elektrik enerjisindən pulsuz istifadə edir.

Bundan başqa, Kərimov əvvəllər rayon administrasiyasının binası qarşısında əkilmiş üç palmanı öz həyətinə əkib.

Dövlət bayrağı meydanının tikintisi üçün ayrılmış 1,5 mln. manat mənimsəmə ilə müşaiyət olunub. Bu zaman inşaat materialları satıcılarına onlardan alınmış məhsulun pulu ödənilməyib.

MTN-in yerli şöbəsinin xidməti binası “Yeni Azərbaycan” Partiyasının yeni ofisinin tikintisi adı ilə Kərimovun rayon telekommunikasiya şöbəsinin rəhbəri təyin edilmiş qohumunun adına özəlləşdirilib.

Üç il əvvəl daşqından müdafiə üçün drenaj sisteminin tikintisi üçün ayrılmış 1,5 mln. manatın da böyük hissəsi mənimsənilib.

İnşaat başa çatdırılmayıb. Şəhərin küçələri qazılmış vəziyyətdə qalıb.

Kərimov həftədə dörd gün Bakıda qalır, bunu gizləmək üçün paytaxta girərkən xidməti avtomobilinin 52 AA 001 dövlət nömrə nişanını 52 AA 128-ə dəyişir.

Rayon rəhbəri rayonda metlax istehsalı üzrə sex açıb, bu metlaxdan abadlaşdırma işlərində istifadə olunur. Bundan başqa, ət bazarı da rayon icra başçısının obyektinə köçürülüb.

Məmmədov bildirib ki, ona qarşı təzyiq “Zerkalo” qəzetinə müsahibəsində (19 noyabr) rayon rəhbərliyinin drenaj sisteminin tikintisinə ayrılmış vəsaiti mənimsəməsi haqqında danışdıqdan sonra başlayıb.

Bundan sonra Məmmədov iki dəfə rayon polisinə çağırılıb və rayon rəhbərliyinin tənqidinə son qoymaq xəbərdarlığı edilib. Müxtəlif mənbələrdən ona həbs edilə biləcəyi, doğmalarının və yaxınlarının cəzalandırılacağı haqqında siqnallar daxil olur.

Fəal ölkə rəhbərliyini onu rayon hakimiyyətinin özbaşınalığından qorumağa çağırır, ona, doğmalarına və yaxınlarına qarşı təxribat olarsa, məsuliyyət ölkə rəhbərliyinin üzərində qalacaq.

Öz növbəsində, Salyan rayon İcra Hakimiyyəti rəhbərinin müavini Zaman Əmirov Məmmədovun bəyanatını təkzib edərək, uydurma adlandırıb.

“Salyana gəlsəniz, özünüz görəcəksiniz ki, onun iddiaları həqiqətə uyğun deyil. Salyanın necə yaxşılaşdığını, çiçəkləndiyini, abadlaşdırıldığını, yeni, gözəl binalar tikildiyini görəcəksiniz. Emil Məmmədov isə pis niyyətlə məlumatlar yayır. Ondan soruşun görək, özü nə vaxtsa daş üstünə daş qoyub?”, deyə Əmirov bildirib. -06D-