Saxta COVİD-19 pasportlarının verilməsinə görə daha bir qrup həkim məsuliyyətə cəlb edilib

Bakı/16.09.21/Turan: Hüquq-mühafizə orqanları peyvənd edilmədən COVİD-19 pasportlarının satışı ilə məşğul olan şəxslərin növbəti qrupunu aşkar ediblər.

Faktla bağlı baş prokuror yanında Korrupsiyaya Qarşı Mübarizə Baş İdarəsində Azərbaycan Cinayət Məcəlləsinin 308.1-ci (vəzifə səlahiyyətlərindən sui-istifadə və 313-cü (vəzifə saxtakarlığı) maddələrilə cinayət işi başlanıb.

Bakıdakı  20 saylı  poliklinikanın həkim-terapevti Günay Hüseynova, bu müəssisənin tibb bacısı Nailə Musayeva, Mehdiabad qəsəbəsi Ailə- Sağlamlıq Mərkəzinin mama-ginekoloqu Bəsti Behbudova və "Paşa-K" firmasının reklam üzrə mütəxəssisi İlahə Quliyeva məsuliyyətə cəlb olunublar.  İstintaq hesab edir ki, həmin şəxslər əlbir olaraq vətəndaşları E-Təbib portalında peyvənd edilmiş kimi qeydiyyatdan keçirərək onları müvafiq sertifikatlarla təmin ediblər.

Saxta COVİD-19 pasportları 100-dən çox adama verilib. Onların hər birindən 200-250 manat (120-150 dollar) alıblar.

İstintaq hüquqazidd əməllərin digər mümkün iştirakçılarının müəyyən edilməsi üzrə tədbirləri davam etdirir.-16D06-