Səhmdarlar Əmlak Komitəsini məhkəməyə verirlər

“Bakı Təmir-Tikinti” ASC-nin səhmdarları çərşənbə günü RATİ-də Əmlak Komitəsinin qanunsuz əməlləri ilə bağlı mətbuat konfransı keçiriblər.

Cəmiyyət 2005-ci ildə yaradılıb, ötən 7 ildə hər hansı fəaliyyəti olmayıb. Cəmiyyətin 200-dən çox səhmdarı var. Səhmlərin 82%-i ASC sədri Əhliman adlı şəxsə, 18%  isə qalan səhmdarlara aidiir. 

Cəmiyyətin təsisçiləri olan səhmdarların ilk iclası 2012-ci ilin sentyabrında keçirilib. Həmin iclasda cəmiyyətin Binəqədidəki 1,5 ha torpaq sahəsinin özəlləşdirilib-özəlləşdirilməməsi iclasın gündəliyində olmayıb və müzakirə edilməyib. Amma sonra mətbuatdan xəbər tutublar ki, həmin torpaq sahəsi hərrac yolu ilə satışa çıxaırlıb. Hərracın təşəbbüsçüsü isə Əmlak Komitəsi olub. 

Səhmdar Vüqar İsmayılov qeyd edib ki, ASC sədri Əhliman Əmlak Komitəsinə torpağın özəlləşdirilməsindən imtina etməsi haqda məktub yazıb. Bu məktuba əsasən Əmlak Komitəsi oktyabrın 20-də torpaq sahəsinin hərraca çıxarılması barədə qərar qəbul edib. Hərracın noyabrın 20-də keçirilməsi gözlənilir. Təqribən 1,5 ha sahənin hərraca 59 min manata çıxaırlması nəzərdə tutulur. 

Səhmdar deyib ki, həmin məktub səhm payının çoxluğuna baxmayaraq, bir nəfər səhmdarın adından yazılıb. Ona görə də səhmdarların iradəsini ifadə etmir. İkincisi,  Dövlət Əmlak Komitəsinin torpağı hərraca çıxarması əsassızdır və bu məhkəmə perspektivi yaradır.

Digər səhmdar Hafiz Babayev isə bu məsələdə korrupsiya izinin olduğunu iddia edib. Səhmdar Əmlak Komitəsinin orta həcmli kiçik və iri müəssisələri özəlləşdirmə prosesini başa çatdırdığını deyib. O, bunu torpaq özəlləşdirilməsilə bağlı yaranan korrupsiya zənciri adlandırıb. Həm də bunun yeganə hadisə olmadığı deyilib. Bir neçə cəmiyyətə məxsus torpaqların səhmdarlardan xəbərsiz naməlum şəxslərə satılması kimi faktların olduğu vurğulanıb. “Komitənin belə əməlləri nəticəsində cəmiyyətə, onun səhmdarlarına aid torpaq başqa şəxslərə aid olur, bilərəkdən münaqişə vəziyyəti yaradılır, səhmdarları paylarını dəyər-dəyməzinə satmaq məcburiyyətində qoyurlar”, - H. Babayev qeyd edib və diqqəti Əmlak Komitəsinin bu addımının törədəcəyi fəsadlara yönəldib.

H.Babayev deyib ki, səhmdarlar komitənin torpağın hərraca çıxarılması ilə bağlı qəbul etdiyi qərarı ləğv etməsi üçün quruma müraciət edəcəklər. Bu nəticə verməsə, məhkəməyə müraciət olunacaq. “Məhkəməyə müraciət etməkdə məqsədimiz Əmlak Komitəsinin belə qanunsuz əməllərinin qaşrısını  almaqdır”, - H.Babayev vurğulayıb.-05C-