Şəki rayon məhkəməsində 15 nəfərin işi üzrə hazırlıq iclası başlayıb

Oktyabrın 30-da Şəki rayon məhkəməsində bu il mayın 23-də Şəki və Zaqatalada həbs edilmiş 15 nəfərin işi üzrə hazırlıq iclası başlayıb. Bu barədə Turan-a məhkəmədəki mənbə bildirib. 

Mənbənin dediyinə görə, məhkəmə qarşısına çıxarılan şəxslər həbs edilərkən adları terrorist kimi hallandırılıb. Amma istintaq həbs edilənlərin terrorist yox, sadəcə qanunsuz silah saxlayan və silah (ov tüfəngləri) satanlar olduğunu müəyyən edib. 

Məhkəmə zalına isə məhkumların yalnız yaxın qohumları buraxılıb. Məhkumların qohumları iclasda iştirak etməyə cəhd etsələr də, polis tərəfindən məhkəmə binasının qarşısından uzaqlaşdırlıblar. 

Turan-ın müxbiri dəfələrlə Şəki rayon məhkəməsindən ittiham olunanların kimliyi, nə vaxt həbs edildiyi, vəkilləri barədə məlumat almağa çalışsa da, hər-hansı məlumat verilməyib. 

Məhkəmə rəsmisi yalnız məhkumların Cinayət Məcəlləsinin 228.2.2 maddəsi ilə (qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə) ittiham olunduğunu bildirib.

Xatırladaq ki, 2012-ci ilin mayında Bakıda keçirilən Eurovision mahnı müsabiqəsi ərəfəsində Azərbaycan hüquq-mühafizə orqanları Bakı, Gəncə, Sumqayıt şəhərlərində, Qax, Zaqatala, Şəki, Qusar, Abşeron, Xaçmaz və Şabran rayonlarında irimiqyaslı xüsusi əməliyyatlar keçirmişdi. Əməliyyatlar nəticəsində Milli Təhlükəsizlik Nazirliyinin yüksək vəzifəli zabiti həlak olmuş, bir neçə əməkdaş isə yaralanmışdı. O zamankı məlumatlarda terrorçu dəstə adlandırılan tərəf də bir neçə itki vermişdi. 40 nəfərdən çox adam həbs edilmişdi. 

Rəsmi məlumatlarda bu terrorçu dəstənin İran xüsusi xidmət orqanlarının tapşırığı ilə Azərbaycanda Eurovision zamanı terror törətmə planları olduğu yer alırdı. 

Müşahidəçilərin fikincə, hazırda Şəki rayon məhkəməsində hazırlıq iclası başlayan 15 nəfər də həmin dəstə ilə birgə ittiham edilənlərdir. -03B-