İki beynəlxalq məhkəmə işi üzrə Azərbaycan hüquq şirkətlərinə 1 320 000 manat ödəyəcək

Azərbaycan hökuməti iki beynəlxalq məhkəmə işi üzrə xarici hüquq şirkətlərinə 1 320 000 manat ekvivalenti ödəyib. 

 Hökumət mənbələrindən alınan məlumata görə,  Maltanın “First İnternational Merchant Bank”ı (“FİM Bank”) Azərbaycan dövlətinə qarşı pul tələbi ilə Niderlandın Haaqa Apellyasiya Məhkəməsinə apellyasiya şikayəti verib. Bu iş üzrə maraqları apellyasiya instansiyasında “Eversheds Faasen” şirkəti təmsil edəcək. Məhkəmə işinin predmeti barədə məlumat verilmir. Amma mümkündür ki, söhbət ləğv edilən “PoçtBank” dövlət bankı ətrafında qalmaqaldan gedir. 

 İkinci iş Beynəlxalq Arbitraj Məhkəməsində araşdırılır. O, “MKT İstehsalat & Kommersiya” MMC-yə məxsus Bakı Beynəlxalq Ticarət Mərkəzinin tikintisindən gedir. Rəsmi məlumata görə, Heydər Əliyev prospektindəki bu mərkəz Azərbaycan-Amerika investisiya sazişi ilə tikilib. Bu işdə Azərbaycanın maraqlarını “Allen & Overy LLP” və “Quinn Emanuel Urquhart & Sullivan UK LLP” hüquq şirkətləri qoruyacaq. 

Bu işlərdə cavabdeh tərəf Azərbaycan Respublikasının Əmlak Məsələləri Dövlət Komitəsidir. Pul vəsaitləri Azərbaycan Respublikasının 2012-ci ilin dövlət büdcəsində nəzərdə tutulmuş Ehtiyat Fondundan ayrılıb. 

 * “MKT İstehsalat & Kommersiya” MMC FHN rəhbəri Kəmaləddin Heydərovun ailəsinə məxsusdur. Şirkət əsasən pambıq biznesi ilə məşğul olur, pambıq istehsalı və emalını inhisarlaşdırıb. --08В—