“Sən demə” gender teleproqramının təqdimatı

Bakı/28.02.20/Turan: Tezliklə İctimai TV-nin efirində gender bərabərliyi mövzusunda yeni veriliş yayımlanacaq. Yaradıcı heyət onu “Sən demə” adlandırıb.

Proqramın müəllifi və aparıcısı, Rasional İnkişaf Uğrunda Qadınlar Assosiasiyası QHT-nin rəhbəri Şəhla İsmayıl qeyd edib ki, ailədə qadınlara qarşı zorakılıq, təhsildə və işə düzəlmədə ayrı-seçkilik, qadın sağlamlığı - bu və ya gender mövzusunun digər aspektləri televiziya verilişlərində müzakirə obyekti olacaq.

Yaradıcı qrup ənənələr və gender, din və onun ailədə, cəmiyyətdə qadına münasibətə təsiri, mentalitet və ya  stereotiplər kimi mövzularda maarifləndirici müzakirələrə başlamağı hədəfləyir. Ekspertlərin çıxışları rəy sorğuları, sıravi vətəndaşların fikirləri ilə gücləndiriləcək.

Layihənin müəllifləri bu mövzuda analoji televiziya layihələri, xüsusən də Almaniyadakı layihələrlə bağlı təcrübəni öyrəniblər. “Biz bu şəkildə televiziya verilişlərinin maksimum effektivliyinə nail olmağa çalışırıq”, - Şəhla İsmayıl deyib.

Layihə Almaniya XİN, İsveçrə Əməkdaşlıq Təşkilatı, Almaniya Müstəqil Sosial Araşdırmalar Mərkəzi və Gürcüstan Qadın İnformasiya Mərkəzi tərəfindən dəstəklənir. 0—