Sentyabrdan məktəblərdə qidalanma üzrə dövlət standartı tətbiq ediləcək

Standartlaşdırma, Metrologiya və Patent üzrə Dövlət Komitəsi AZS 747-2013 “Təhsil müəssisələrində təhsil və tərbiyə alanların qidalanması üzrə dövlət standartı”nı təsdiq edib.

Yeni standart təhsil müəssisələrində qidanın təhlükəsizliyinə, tərkibinə, qida dəyərliliyinə, həcminə, keyfiyyətinə və qidanın qəbul şəraitinə, o cümlədən təhsil müəssisələri üçün təhlükəsiz və keyfiyyətli qida istehsalını təmin edən texnoloji şəraitə vahid tələbləri müəyyən edir. Komitənin mətbuat xidmətinin məlumatına görə, standart təhsil və tərbiyə alanların sağlamlığının qorunması və möhkəmləndirilməsini nəzərdə tutur və sentyabrın 2-də qüvvəyə minir. Standartda 3-18 yaşlı uşaq və yeniyetmələr üçün fizioloji tələbat normaları, uşaqların qidalanmasında istifadə edilməsi üçün tövsiyə olunan və istifadəsinə icazə verilməyən məhsulların siyahısı, məktəbəqədər təhsil müəssisələri üçün orta gündəlik ərzaq çeşidinin siyahısı və s. əks olunub.

Cəmiyyətin marağını nəzərə alaraq Komitə öz saytında (http://azstand.gov.az/index.php?lang=3&id=2) məktəbəqədər təhsil müəssisələrində uşaqların qidalanmasında istifadə edilməsi üçün  tövsiyə olunan və ümumi təhsil və ilk peşə təhsili müəssisələrində uşaq və yeniyetmələrin qidalanması zamanı istifadəsinə icazə verilməyən məhsulların siyahısını açıqlayıb..--08D—