Şirkətlərin mənzil fırıldağı bitmək bilmir

“Kamran B.Ə” şirkətinin mənzil tikintisi adı ilə aldatdığı bir qrup zərərçəkmiş vətəndaş çərşənbə axşamı Beynəlxalq Mətbuat Mərkəzində (BMM) mətbuat konfransı keçirib.

Zərərçəkmişlərin vəkili Tağı Hüseynov qeyd edib ki, 2008-ci ildən bu yana mübarizə aparsalar da, nə mənzillərini, nə də pullarını ala bilmirlər. 2013-cü ildə şirkətin rəhbərliyi başda Ələkbər Babayev olmaqla həbsə alınıblar. Bakı Ağır Cinayətlər Məhkəməsinin 2013-cü ildə çıxarıdğı qərara əsasən, zərərçəkən vətəndaşların pulları həbs edilən şirlkət rəhbərliyinin varidatının satılması nəticəsində ödənməlidir. Amma indiyə kimi bu, icra edilməyib. Bu, azmış kimi, mənzil üçün pul ödəyən şəxslərin mənzilləri tamam başqa şəxslərə satılıb. Zərərçəkən vətəndaşların pullarını həbsə alınan şirkət rəhbərliyinin ödəyəcəyi barədə məhkəmə qərarına əsaslanan şirkətin yeni rəhbərliyi mənzilləri başqa müştərilərə satbılar. Vəkilin sözlərinə görə, bir mənzilin 4-5 müştəriyə satlması kimi faktlar var.

Dələduzluğa məruz qalan vətəndaşlar bütün instansiyalara müraciət etsələr də, əsaslı cavab ala bilməyiblər. Bakı Apellyasiya Məhkəməsi də keçən ilin dekabrında çıxardığı qərarda vətəndaşlara dəyən zərəri şirkətin həbs edilən rəhbərliyinin ödəməsi kimi qərarı qüvvədə saxlayıb. Hazırda məsələ Ali Məhkəmə səviyyəsində baxış mərhələsindədir. Amma məsələnin nə zaman gündəliyə çıxarılacağı barədə vətəndaşlarda hər-hansı informasiya yoxdur.

“Biz bilmirik ki, artıq kimə müraciət edək, dərdimizə kim əlac etsin, adamı lap özünü öldürmək həddinə çatdırırlar”, - deyə vətəndaşlardan biri çıxılmaz durumda olduqlarını nəzərə çatdırıb.

Bakıda mənzil tikintisi adı ilə vətəndaşların aldadılması 2006-cı ildən başlayan mənzil tikintisi bumu fonunda baş verib. Yüzlərlə vətəndaş mənzil tikintisi adı ilə fırıldaqçı şirkətlərin qurbanlarına dönüb, həm pullarını itirib, həm də mənzil ala bilməyib. Dövlət qurumlarına şikayətlər nəticəsində dələduzlrar həbs olunsa da, bunların yerinə yeniləri peyda olub. 

Bu günlərdə Prezident Administrasiyası ölkədə mənzil tikintisi adı ilə dələduzluq edən 33 şirkətin adını ictimaiyyətə açıqlayıb. Bu adları bir daha bizlər də xatırladırıq ki, vətəndaşlar bu dələduzların toruna düşməsinlər.

“İnşaatçı GM”, “Qolden”, “Azərtikinti AQF”, “İdeal-İnşaat”, “Şahbulaq”, “Abşeron-1”, “A.E.K”, “Xəmsə inşaat”, “Qaraçay”, “Bios”, “Bəyaz”, “Dərəçiçək”, “Meqa-Siti Holdinq”, “Elita-R”, “Gənc”,  “R+R”, “Birlik inşaat”, “Ulduz”, “Folklor”, “Ələsgəroğlu”, “ABC”. “Fuad LTD”, “KamranB.Ə”, “Safari-N”, “Yeni Yasamal”, “Effekt inşaat”, “AENT-L”, “Hayan-E”, “Klass Azko”, “Badukubə”, “Olimpus-AZ”, “Cənnət”, “Xəmsə”. -05C-