Yerevan həbs edilmiş kəlbəcərliləri azad etmək niyyətində deyil

Yerevan/17.02.15/Turan-Armİnfo: Ermənistan XİN rəhbəri Edvard Nalbandyan çərşənbə axşamı ATƏT-in Minsk Qrupunun həmsədrləri Ceyms Uorlik (ABŞ), Pyer Andrie (Fransa) və İqor Popovu (Rusiya), habelə ATƏT-in fəaliyyətdə olan sədrinin şəxsi nümayəndəsi Anjey Kasprşiki qəbul edib.

XİN-in mətbuat xidmətinin məlumatına görə, Nalbandyan Azərbaycanı çoxillik danışıqlar prosesini və Qarabağ münaqişəsinin tənzimlənməsinin əsas prinsiplərini pozmaq cəhdində ittiham edib.

Bakı Qarabağ münaqişəsindən öz ölkəsində siyasi repressiyalara bəraət qazandırmaq üçün istifadə etməyə çalışır.

Azərbaycan XİN rəhbəri Məmmədyarovun Böyük Sülh Müqaviləsinin müddəaları üzərində işə başlamaq çağırışlarına cavabda Nalbandyan deyibki, Ermənistan və Qarabağ razılıq verərsə, bu, mümkün olacaq.

Ermənilərin işğal etdiyi Kəlbəcər rayonunun keçmiş sakinləri və Ermənistanda diversiyaçı kimi mühakimə edilmiş Dilqəm Əsgərov və Şahbaz Quliyevin taleyinə toxunan Nalbandyan deyib ki, Bakının onların azad edilməsinə nail olmaq cəhdləri əbəsdir.

“Onların cinayəti, o cümlədən 17 yaşlı gəncin uğurlanması, işgəncəyə məruz qoyulması və amansızca öldürülməsi sənədləşdirilib və sübut edilib”, deyə o qeyd edib.

Sabah ABŞ dövlət katibinin köməkçisi Viktoriya Nuland Yerevana gələcək, o da həbs edilmiş kəlbəcərlilər məsələsini qaldırmağı vəd edib. -02D-