Şirvan məhkəməsi FHN-ə qarşı iki iddianı təmin edib

Mayın 14-15-də Şirvan İnzibati-İqtisad Məhkəməsində 2010-cu ilin may-iyun aylarında Kür daşqınları zamanı zərər çəkmiş 116 vətəndaşın iddiası üzrə dinləmələr keçirilib. Cavabdehlər Fövqəladə Hallar Nazirliyi və “Meliorasiya və Su Təsərrüfatı” dövlət ASC-dir.

Hakim Elxan Əmirəliyevin sədrliyi ilə keçirilən kollegiya bütün şikayətlərə rasional qaydada  baxmaq məqsədilə onları qruplara ayırıb. Dinləmələr FHN nümayəndəsinin iştirakı ilə keçirilib, lakin melioratorlar iddiaya məhəl qoymayıblar.

“Kür” Vətəndaş Cəmiyyəti Gərargahının koordinatoru Oqtay Gülalıyevin sözlərinə görə, vətəndaşların əsas iddiaları daşqınlardan sonra tikililərin vəziyyəti ilə bağlı FHN-nin ekspertizasına, həmçinin istismara verilən evlərin keyfiyyətinə aid olub.

“İddiaçılar tikililərin müstəqil qiymətləndirilməsi üçün xüsusi komissiyanın yaradılmasını tələb ediblər. 

İddialara evlərin yaşayış üçün yararsız olması barədə sənədli sübutlar (video və fotokadrlar) əlavə edilib. Lakin hakim Elxan Əmirəliyev  iddiaçıların bu vəsatətini təmin etməyib”, - hüquq müdafiəçisi bildirib.

Bununla belə, iki şikayətçinin şikayəti təmin edilib. Birində FHN keyfiyyətsiz  tikinti ilə razılaşıb və evin yenidən tikilməsi qərara alınıb.

Digər iddia üzrə bərpa və möhkəmləndirmə işləri üçün kompensasiyanın ayrılması barədə qərar qəbul olunub. Dinləmələr mayın 27-də davam edəcək.17B-